प्रधानमन्त्री विरुद्ध अविश्वासया प्रस्ताव

राष्ट्रपति विद्या देवी भण्डारीं संसद विघटनया सिफारिस अनुमोदन याये न्ह्यः हे संसदय् प्रधानमन्त्री विरुद्ध अविश्वासया प्रस्ताव दर्ता जूगु सीदुगु दु । आइतवाः सुथय् च्वंगु मन्त्रिपरिषद्या बैठकय् ओलीं मध्यावधि चुनावय् वनेमाली धकाः खँ ल्ह्वनादीगु जुयाच्वन, तर बैठकय् उपस्थित प्यम्ह मन्त्रीतय्सं अथे याये मजिउ धायेवं ओलीं ‘का अय्सा लिपा बिचाः याये’ धकाः बैठकं दनावन ।

थ्व बैठक लिपा प्रचण्ड पक्षयात प्रधानमन्त्रीं ल्ह्वनेत्यंगु पलाःया बारे जानकारी वन । थ्व जानकारी वयेवं प्रचण्ड–माधव पक्षया ८९ म्ह सांसदतय् हस्ताक्षर सहित नेकपाया प्रमुख सचेतक देव गुरुङं संसदय् सुथय् १०ः५० बजे प्रधानमन्त्री विरुद्ध अविश्वासया प्रस्ताव दर्ता यानादीगु खः । प्रमुख सचेतक गुरुङ मिडियाय् संसद विघटनया सिफारिस याःगु खबर वयेवं प्रधानमन्त्रीया थ्व असंवैधानिक पलाः पनेत अविश्वास प्रस्ताव दर्ता यायेमाःगु खँ धयादीगु दु ।