नेपालभाषा ब्वंसां गणित बञ्चित मयायेत माग

येँ – स्कुल तहया तगिं ९ व १० य् नेपालभाषा ब्वनीपिं विद्यार्थीतय्सं अतिरिक्त गणित व कम्प्युटर थेंज्याःगु विषय काये मदइ कथं यानातःगु व्यवस्था चीकेत शिक्षा मन्त्री देवेन्द्र पौडेलयात इनाप याःगु दु ।

म्हिगः नेवाः देय् दबूया नायः पवित्र वज्राचार्यया नेतृत्वय् थीथी नेवाः खलः पुचः व तामाङ समुदायया नं खलः पुचःया प्रतिनिधिपिनिगु पुचलं शिक्षा मन्त्री पौडेलयात नापलानाः उगु इनाप याःगु खः ।

उगु प्रतिनिधि मण्डलं शिक्षा मन्त्री पौडेलयात छगू ज्ञापनपौ नं लःल्हाःगु खः । ज्ञापन पतिइ देशय् समावेशी संविधान वयाः हरेक ख्यलय् समावेशीकरण जुइधुंकूगु अवस्थाय् नं पञ्चायती व्यवस्थां २०२८ सालय् लागू याःगु शिक्षा नीतिया हे आधारय् भाषा विषय काइपिं विद्यार्थीतय्सं अतिरिक्त गणित व कम्प्युटर विषय ब्वने मदयेकातःगु जूगुलिं उकियात चीकाः नेपालभाषा नं ब्वने दइगु व अतिरिक्त गणित वा कम्प्युटर नं ब्वने दइगु व्यवस्था याना बीत इनाप यानातःगु दु ।