हलिं नेवाः दबूपाखें झिम्हेसित हना

येँ – येँय् नकतिनि क्वचाःगु हलिं नेवाः दबूया स्वक्वःगु तःमुँज्याय् देय्या थीथी ख्यलय् विशिष्ट योगदान यानादीपिं झिम्ह नेवाःतय्त नं हनेगु ज्या जूगु खः । वंगु शुक्रवाः राष्ट्रिय सभागृहय् जूगु तःमुँज्याया उलेज्याय् मूपाहां वाङ्मय शताब्दी पुरुष सत्यमोहन जोशीं वय्कःपिंत दोसल्लां न्ययेकाः हनापौ देछासें उगु सम्मान यानादीगु खः ।

ज्याझ्वलय् साहित्य मार्फत नेपालभाषायात प्रचार यायेगु ज्याय् योगदान बियादीगुलिं जनकवि दुर्गालाल श्रेष्ठ, नेवाः आन्दोलनयात च्वन्ह्याकादीम्ह मल्ल के. सुन्दर, पौभाः कलाकार प्रेममान चित्रकार, मिसा उद्यमि अम्बिका श्रेष्ठ, जीवविज्ञान विज्ञ कमलेशलता राजभण्डारी, पत्रकार पुष्करलाल श्रेष्ठ, शिक्षाविद् हितकरवीर सिं कंसकार, कासामि बैकुण्ठ मानन्धर, नेवाः न्ह्यलुवा डा. महेशमान श्रेष्ठ व संस्कृतिविद् छत्रबहादुर कायस्थयात हनेज्या याःगु खः ।

कलाकार प्रेममान चित्रकार उसाँय् मदयाः अक्सिजन हे घानाः ज्याझ्वलय् झायादीगु जूगुलिं वय्कःयात मूपाहां सत्यमोहन जोशीं क्वय् मेचय् हे झायाः हनापौ लःल्हानादीगु खः ।उगु हे ज्याझ्वलय् मदुम्ह गायक रमेश ताम्राकारया नामय् वय्कःया जहान अन्जना ताम्राकारं नेवाः गायकगायिकापिंत सिरपाः बीगु लागिं १ लाख २५ द्वः तकाया अक्षय कोष घोषणा यानादीगु खः । लिसें उगु ज्याझ्वलय् नेवाः संस्कृति च्वन्ह्याकेगु लागिं इतिहासविद्–संस्कृतिविद् डा. साफल्य अमात्यं नं छगू लाख तकया कोष नीस्वनेगु घोषणा यानादीगु खः ।

सम्बन्धित बुखँ

LEAVE YOUR COMMENTS