अवकाश काइपिं कर्मचारी १६०० जक

येँ -२२ हजार निजामती कर्मचारीयात लक्षित यानाः सरकारं हःगु स्वेच्छिक अवकास योजनाय् मुक्कं झिंखुसःम्ह कर्मचारीं जक आवेदन बिउगु दु । थ्व योजनाय् आवेदन बीगु म्याद आः निवाः जक दनि । सरकारं ४५ न्हुया म्याद तयाः स्वेच्छिक अवकाशया आह्वान याःगु खः । संघीय संरचना कथं राज्यया स्वंगुलिं तहया कर्मचारी समायोजन यायेमाःगुलिं अन वने चाहे मजूपिं कर्मचारीतय् निंतिं धकाः सरकारं एकमुष्ठ न्हय्दँया पेन्सन ध्यबा बियाः बिदा बीगु कथं थ्व योजना हःगु खः । थ्व योजनाय् ५० दँ पूवनेधुंकूपिं वा सेवा अवधि २० दँ पूवनेधुंकूपिंसं जक आवेदन बी फइ । थज्याःपिं कर्मचारीत आः २२ द्वः ति दु ।

थ्व योजना घोषणा जुइधुंकाः मुक्कं झिंखुसःम्हेसिनं जक आवेदन बिउगु खँ धासें सामान्य प्रशासन मन्त्रालयं अझं म्याद दनिगुलिं थ्व सुविधा काइपिं अप्वइगु आशा याःगु दु ।मन्त्रालयया प्रवक्ता शिवराम न्यौपानें बीबीसीयात धयादीगु दु, ‘आःतक थ्यंमथ्यं १५ निसें १६०० म्हेसिनं आवेदन बीधुंकूगु दु । तर वय्कःपिनिगु धापू न्यनेगु स्वयेबलय् च्याद्वःनिसें झिद्वःम्हेसिनं जक अवकाश काइगु सम्भावना दु ।’संघीय संरचना कथं संघ, प्रदेश, स्थानीय तहय् चुस्त व स्यल्लाःपिं कर्मचारी तयेगु निंतिं थ्व अवकाशया योजना हःगु खः ।

तर थ्व योजनां अनुभवी कर्मचारीत म्हो जुइगु व राष्ट्रयात तःधंगु आर्थिक भार नं लाइ धासें गुलिसिनं थुकिया आलोचना नं यानाच्वंगु दु ।सम्भावित खर्चयात कयाः सामान्य प्रशासन मन्त्रालयया प्रवक्ता न्यौपानें धयादी, ‘न्हय्दँया पेन्सनया लिसें नियम कथं दइगु संचयकोष, वासः खर्च, सञ्चित बिदाया दां मुनेबलय् ४० निसें ४२ अर्ब तका खर्च जुइगु अर्थ मन्त्रालयया अनुमान दु ।’निजामति किताबखानाया कथं निजामती सेवाय् ८५ द्वः कर्मचारी दु । न्हूगु संरचनाय् सवा लाख कर्मचारी आवश्यक जुइगु अनुमान दु ।