ख्वपया सिपाडोलय् तःजिक बुरांज्या

ख्वप –  ख्वपय् नेवाः किसानतय् मौलिक धार्मिक विधि बुरांज्या वंगु आइतवाः न्हिछियंकं तःजिक जुल । ख्वप नगरपालिका वडा नं. ५ (साविकया ८)य् लाःगु चण्डेश्वरीइ च्वंम्ह भीमबहादुर माकःपाखें उगु ज्याझ्वः जूगु खः । वय्कःया काय सीताराम माकः मू ग्वसाः खलः जुयाः न्ह्याकूगु थ्व ज्याझ्वः ताःईतक हे न्ह्यानाच्वंगु खः ।

सूर्यविनायक नगरपालिका वडा नं. ८ सिपाडोलस्थित चःखुइ च्वंगु थःगु हे पुख्र्यौलि बुँइ थःगु हे व्यक्तिगत खर्चय् थुकथं तःजिक बुरांज्या यानादीगु खः । ज्याझ्वः ताःलाकेया निंतिं एकान्त कुमारि दाफा खलः नापं आपालं संघसंस्था व व्यक्तिगत रुपं नं वय्कःपिंत ग्वाहालि याःगु खः ।

वंगु नीन्यादँ लिपा थुकथं न्हापांखुसी तःजिक बुरांज्या जूगु स्थानीयवासीलिसें १७ वडाया पुलांम्ह वडाअध्यक्ष लक्ष्मीनारायण राजलवट खत्रीं कनादिल । वडाअध्यक्ष, समाजसेवी, बुद्धिजीवी, पत्रकार नापं थीथी ख्यःया विशिष्ट व्यक्तित्वपिनिगु सहभागिता दुगु ज्याझ्वलय् विधिपूर्वक पुजालिसें थीथीकथंया परम्परागत विधिविधान नं नियमकथं हे पूवंकेगु ज्या जूगु स्वकुमिपिंसं धाःगु दु ।

नापं उपस्थिति जूपिं सकसितं समय्बजि नं नकूगु खः । थ्व स्वयां निदँ न्ह्यः भक्तपुर बचत तथा ऋण सहकारी संस्थापाखें नं थुकथंया हे ज्याझ्वः सूताया वडाअध्यक्षद्वयः कृष्णगोपाल कुसी व लक्ष्मीप्रसाद कुसीया बुँइ न्यायेकेगु ज्या जूगु खः ।

सम्बन्धित बुखँ

LEAVE YOUR COMMENTS