मेयर साहं तयेत्यंगु यम बुद्धया झ्वाता विवाद

येँ (नेपालभाषा टाइम्स)- छुं ई न्ह्यः तिनि ¥याप म्येया धेंधेंबल्लाखय् बुद्धया मूर्ति दुगु मुखः पुइकूगु कारणं विवादय् वयाच्वंम्ह येँ मनपाया मेयर बालेन्द्र साह आः हानं मदुम्ह ¥यापर यम बुद्धया झ्वाता तयेगु धकाः बियादीगु अभिव्यक्तिं यानाः विवादय् लाःगु दु ।

छुं ई न्ह्यः तिनि आत्महत्या यानाः मदुम्ह ¥याप गायक यम बुद्धया झ्वाता येँ मनपापाखें येँय् तयेगु धकाः न्ववानादीगु कारणं मेयर साह विवादय् लाःगु खः । वय्कःया थ्व अभिव्यक्ति वयेवं येँया स्थानीय जनतां उकियात कयाः कडा प्रतिक्रिया बियाहःगु दु । राजधानी येँय् धाथें सुं गायकया हे झ्वाता तयेगु खःसा न्हापांम्ह गायक सेतुराम प्रधान, नारायणगोपाल, प्रेमध्वज आदि यक्वसिया झ्वाता तयेमाःगु खः, तर वय्कःपिं फुकसित ल्वःमंकाः पिने जिल्लायाम्ह मनूया झ्वाता येँय् तयेगु धाल धकाः मेयर साहया आलोचना यानाहःगु खः ।

थ्व खँयात कयाः सामाजिक सञ्जालय् नं वय्कःया कडा विरोध जुयाच्वंगु खनेदु । येँया स्थानीय जनतां वय्कःयात यम बुद्धया झ्वाता तयेगु थ्व घोषणा लित कायेत नं कडा दबाब बियाच्वंगु दु ।

थुकियात कयाः कडा विरोध वयेवं मेयर साहं आः मनपाया बजेटं मखुसें थःगु हे तलबं यम बुद्धया झ्वाता तयेगु धकाः घोषणा यानादीगु दु । वय्कलं यम बुद्धया मांबौयात हे नापलानाः नं थःगु तलबं झ्वाता तयेगु जुइ धकाः बचं बियादीगु खँ सीदुगु दु ।

तर स्थानीय जनतां धाःसा मेयरया थःगु हे तलबं तयेगु खःसां नं थ्व झ्वाता येँय् दुने तये दइ मखु धकाः ख्याच्वः बियाहःगु दु ।

सम्बन्धित बुखँ

LEAVE YOUR COMMENTS