
येँ एमाले अध्यक्ष केपी ओली प्रधानमन्त्री जुइवं भारतीय प्रधानमन्त्री नरेन्द्र मोदीं चान्हय् हे फोन याःगु दुसा चिनियाँ राज्यपरिषदया प्रधानमन्त्रीली खछ्यांगं थौं छगू सन्देश छ्वया हयाः बधाइ बिउगु दु ।
भारतीय प्रधानमन्त्री मोदीं बहनी साढे १० बजे फोन यासें प्रधानमन्त्री जुयादीगुलिं भिंतुना देछायादीगु खः । अथेहे वय्कलंं प्रधानमन्त्री ओलीयात भारतय् स्वागत यायेत थःपिं आतूर दुगु खँ धयादीगु खः । थ्व झ्वलय् वय्कलं नेपाःया विकासया निंतिं भारतं फुगु ग्वाहालि यायेगु प्रतिबद्धता प्वंकादीगु खः ।
प्रधानमन्त्री ओलीं थःगु ध्यान नेपाःया विकास व समृद्धिइ केन्द्रीत दुगु धासें भारत लिसेया स्वापू अझ क्वातुकेगु कुतः यायेगु खँ धयादीगु खः ।
थ्वयां न्ह्यः ओली प्रधानमन्त्री जुइवं भारतीय राजदूत मन्जिव सिंह पूरी मार्फत प्रधानमन्त्री मोदीं भिंतुना सन्देश नं छ्वयाहःगु खः ।
अथेहे चिनियाँ प्रधानमन्त्री नं थःगु भिंतुना सन्देशय् प्रधानमन्त्री ओलीया कार्यकालय् चीन व नेपाःया स्वापू अझ क्वातुइगु व पारस्परिक लाभया द्विीपक्षीय सहयोगया क्षेत्रय् मिले जुयाः ज्या यायेगु खँ धयातःगु दु ।
वय्कलं एक क्षेत्र एक मार्ग (वन बेल्ट वन रोड) अन्तर्गत थीथी क्षेत्रय् पारस्परिक लाभयानिंतिं ग्वाहालि यायेगु खँ न्ह्यथनादीगु दु ।
LEAVE YOUR COMMENTS