गुंपुन्हि व सापारु थःथःगु हे परम्परा कथं हने

येँ (नेपालभाषा टाइम्स)- थुगुसीया गुंपुन्हि व सापारु गुकुन्हु हनेगु धकाः पिहां वयाच्वंगु विवादय् अप्वः तमक्यँसे थःथःगु रित व परम्परा कथं निगुलिं नखः हनेत विज्ञतय्सं इनाप याःगु दु ।

थुगुसी येँ, यल, ख्वप व थिमिइ थःथःगु हे परिस्थितिया कारणं गुंपुन्हि व सापारु हनेगु न्हि अलग अलग लाः वःगु जुयाः उकियात थःथःगु हे परम्परा कथं हनेमाःगु खँ नं धाःगु दु ।

थ्व झ्वलय् थिमिया अभियन्ता लिसें शंखधर साख्वाः प्रतिष्ठानया पुलांम्ह नायः श्याम मानन्धरं थिमि नगरपालिकाय् म्हिगः जूगु छगू मुँज्याय् नं थुकथंया हे सल्लाह जूगु खँ कँसें सुनानं नखःया तिथि थथे हे जुइमाः धकाः निर्धारण मयाःगु जानकारी बियादिल । थःगु धापू धकाः छुं सञ्चार माध्यमय् गलत सूचना प्रवाह जुयाच्वंगु खँ कँसें वय्कलं धयादिल, ‘नखः थःथःगु हे परम्परा कथं हनेगु खः । पञ्चाङ्गं नं अथे हे धाःगु दु । थिमिइ नं थःगु परम्परा कथं हनेगु खँ जुल ।’

थिमिइ १५ गते कुन्हु नील बाराही व भैलःद्यःया प्याखं पिहां वइगु जूगुलिं अन १४ गते हे सापारु मयासें मगाः । अथे हे यलय् नं १५ गते मतयाः पिकाये माःगु जूगुलिं १४ गते हे सापारु यायेमाः । येँय् १५ गते मेगु छुं विशेष पर्व हनेमाःगु मदु । उकिं १५ गते सायाः पिकायेगु उपयुक्त जुल ।

मेथाय् १४ गते पुन्हि माने याःसां वकुन्हु भद्रा लाः वःगु जूगुलिं ख्वपय् अज्याःगु पुन्हि कुन्हु भिं ज्या यायेगु चलन मदु । उकिं अन १३ गते हे पुन्हि न्यायेकाः १४ गते सायाः पिकायेगु निर्णय जूगु दु ।

थुुगुसी पञ्चाङ्ग निर्णायक समितिं गुंपुन्हि व सापारु भदौ १४ गते छन्हुं हे न्यायेकेगु धकाः तिथि पिकाःगु खःसां उकियात यल बाहेक येँ व ख्वपं धाःसा स्वीकार मयासे थःथःगु हे परम्पराकथं हनेगु निर्णय यात ।