
येँ (नेपालभाषा टाइम्स)- म्हो जुया वनाच्वंगु नेपालभाषा मचा साहित्य च्वन्ह्याकेगु ताः तयाः म्हिगः येँय् छगू सहलह गोष्ठी जुल । नेवाः देय् दबू येँ मनपा २३ वडा कचाया ग्वसालय् जूगु उगु ज्याझ्वलय् २३ वडा कचां आः थःपिंसं मचा साहित्यय् जक केन्द्रित जुयाः ज्याखँ न्ह्याका वनेगु धकाः घोषणा याःगु खः ।
ज्याझ्वलय् देय् दबूया नायः पवित्र वज्राचार्यं सहलहपाखें वःगु सुझावयात न्ह्यःने तयाः आः कचापाखें मचा साहित्य च्वन्ह्याकेत थीथी ज्याझ्वः याना वनेगु खँ कनादिल ।
ज्याझ्वलय् वरिष्ठ साहित्यकार रमेशकाजी स्थापितं ज्यापौ न्ह्यब्वसें मचा साहित्य च्वन्ह्याकेगु लागिं यायेमाःगु थीथी ज्याझ्वःत प्रस्ताव यानादिल । भाषा आयोगया दुजः सुरेश किरणं मचा साहित्य च्वन्ह्याकेगु लागिं २३ वडाया ल्याय्म्हत न्ह्यचिउगु लसताया खँ खः धयादिल । २३ वडाया वडा अध्यक्ष मचाराजा महर्जनं थज्याःगु रचनात्मक ज्याखँ यायेत वडापाखें माःगु ग्वाहालि यायेगु बचं बियादिल ।
ज्याझ्वलय् डा. पुष्पराज राज–कर्णिकार, प्रतिसरा साय्मि, राजभाइ जकःमि, प्रेमहिरा तुलाधर, आर मानन्धर, बिष्णु चित्रकार, रविन साय्मि, अनिल स्थापित आदिपिंसं मचा साहित्य च्वन्ह्याकेत किपा जक दुगु सफू पिकायेमाःगु, कार्टुन व म्ये पिकायेमाःगु, तःधीपिं साहित्यकारपिनि दथुइ मचा साहित्य धेंधेंबल्लाः यायेमाःगु आदि सुझाव बिउगु खः । कचाया नायः आशाकाजी महर्जनया सभापतित्वय् जूगु उगु ज्याझ्वलय् कचाया पदाधिकारीपिं दिनेश वज्राचार्य व दिनेश सुवालपिंसं नं न्ववानादीगु खः ।
LEAVE YOUR COMMENTS