कुलमानया पक्षय् येँय् प्रदर्शन

येँ (नेपालभाषा टाइम्स)- नेपाल विद्युत प्राधिकरणया कार्यकारी निर्देशक कुलमान घिसिङया पक्षय् म्हिगः येँय् प्रदर्शन याःगु दु । घिसिङयात सरकारं अनावश्यक दबाब बिउगु धासें म्हिगः ल्याय्म्हतय्सं प्रदर्शन याःगु खः ।

प्रदर्शनकारीतय्सं सरकारं डेडिकेटेड व ट्रंकलाइनया प्रिमियम महसुल बिबादय् सरकारं तःधंपिं उद्योगपतितय्त ध्यबा मकासे छुट बीत्यंगु धासें विरोध याःगु खः । प्रदर्शनया झ्वलय् सरकारया शतप्रतिशत स्वामित्वय् दुगु प्राधिकरणयात लबः नकीगु संस्थाया रुपय् स्थापित याःसां नं घिसिङयात सरकारं पूर्वाग्रह तःगुलिं विरोध यायेमाःगु खँ धाःगु दु ।

विरोध ज्याझ्वलय् ब्वति काःपिंसं ‘२२ अर्ब विद्युत बक्यौता ध्यबा असुल या, विद्युत प्राधिकरण डुबे यायेगु चलखेल बन्द या, तानाशाही प्रवृत्ति बन्द या’ धकाः च्वयातःगु प्लेकार्ड नं ब्वया वःगु खः ।
माओवादी सरकारं नियुक्त याना–तःम्ह घिसिङयात लिकायेगु लागिं वर्तमान ओली सरकारं कुतः यानाच्वंगु अनुमान जुयाच्वंगु दु ।