मानव बेचबिखन पनेगु ज्याय् नेपाः लिउने

येँ – अमेरिकी सरकारं दँय्दसं तयार याइगु मानव बेचबिखन सम्बन्धी प्रतिवेदनय् नेपालं मानव बेचबिखन नियन्त्रण यायेत माक्व पलाः मछिउगु ठहर यानातःगु दु । ‘ट्राफिकिङ इन पर्सन्स’ (टिप) नांया प्रतिवेदनय् मानव बेचबिखन बारे चुस्त अनुसन्धान जुइमाःगु व पीडितयात विचाः यानाः नियम कानुन दयेकेगुमाःगु खँ न्ह्यथनातःगु दु । तर सरकारं धाःसा मानव बेचबिखन सम्बन्धी ऐन संशोधन यायेगु ज्या जुयाच्वंगु खँ धाःगु दु ।

प्रतिवेदनय् मानव बेचबिखन नियन्त्रण यायेत सरकारं याःगु सकारात्मक ज्या व आः वइगु न्हिं यायेमाःगु विषययात कयाः नं न्ह्यथनातःगु दु । बेचबिखनय् लाःपिनिगु उद्धारया निंतिं नेपालं बिस्कं ज्याकू हे चायेकूगु धासें उगु ज्यायात कयाः सरकारया प्रशंसा नं यानातःगु दु ।

मानव बेचबिखन सम्बन्धी घटनायात वैदेशिक रोजगार ऐन अन्तर्गत दर्ता याकेगु ज्यायात कयाः धाःसा सरकार कुंखिनातःगु दु । थज्याःगु व्यवस्थां पीडकयात अःपुइ धासें मानव बेचबिखन अन्तर्गत हे मुद्दा दर्ता यायेमाःगु सुझाव नं बियातःगु दु ।

उकथं हे संयुक्त राष्ट्र संघं सन् २००० स हःगु पर्लेमो प्रोटोकलयात नेपालं अनुमोदन मयाःगु विषययात कयाः नं प्रतिवेदनय् न्ह्यथनातःगु दु । उगु विषय बारे सहलह जूगु ताः ई दयेधुंकूगु व उकी विदेशी भूमिइ समस्याय् लाःपिं नेपाःमियात उद्धार यायेत अःपुइगु खँ धयातःगु दु । तर उगु प्रोटोकलयात कयाः नेपाः सरकारं चिउता प्वंकेमाःगु सुझाव नं बियातःगु दु ।
तर सरकारं धाःसा कानून संशोधन यायेगुनिसें पीडितया संरक्षण लगायतया ज्या जुयाच्वंगु खँ धाःगु दु । राष्ट्र संघया प्रोटोकल नाला काल धाःसा खाडी मुलुकय् घरेलु ज्यामि कथं ज्या यायेत वनीपिनिगु प्रतिबन्ध फुकुवा जुइगु व नेपाःमि वनीगु गन्तव्य देशय् उमिगु अधिकार संरक्षण जुइगु कथं सम्झौता यायेत नं सुझाव बियातःगु दु ।