दैलेखय् क्वारेन्टाइनय् सीम्ह मनूया रिपोर्ट पोजेटिभ

येँ – दैलेखया नेपाल विद्युत प्राधिकरणया क्वारेन्टाइनय् सीम्ह छम्ह मनूया कोरोनाया रिपोर्ट पोजेटिभ वःगु दु । दुल्लु नगरपालिकाय् च्वंगु नेपाल विद्युत प्राधिकरणया क्वारेन्टाइनय् शनिवाः सुथय् सीम्ह ३५दँया मिजंयात कोरोना भाइरसया संक्रमण जूगु पुष्टि कर्णाली प्रदेशया सामाजिक विकास मन्त्रालयया स्वास्थ्य महाशाखां याःगु दु ।

दुल्लु नगरपालिका-११ खागितडाया उम्ह मिजं भारतं लिहांवयेधुंकाः झिन्हु न्ह्यःनिसें क्वारेन्टाइनय् च्वनाच्वंगु खः । शनिवाः सुथय् मदुम्ह उम्ह संक्रमितया स्वाब संकलन यानाः कर्णाली स्वास्थ्य विज्ञान प्रतिष्ठान जुम्लाय् पीसीर विधिपाखें परिक्षण याःगु खः ।

थ्वनापं नेपालय् कोरोना भाइरसया कारणं सीपिनि ल्याः ७म्ह थ्यंगु दु । तर स्वास्थ्य तथा जनसंख्या मन्त्रालयं धाःसा दुल्लुया क्वारेन्टाइनय् सीम्ह मनूया बारे आधिकारी रुपं जानकारी मब्यूनी ।