येँ महानगरं परम्परागत गुथियात ग्वाहालि बीगु

येँ – येँ महानगरपालिकाया प्रमुख विद्यासुन्दर शाक्यं आर्थिक अभावया कारणं महानगर दुनेया अमूर्त सम्पदालिसे सम्बन्धित गुगुं नं गतिविधि रोके जुइगु वा बन्द जुइगु अवस्था मवयेमा धकाः महानगरं परम्परागत गुथियात छगू छगू लख तका दां ग्वाहालिकथं उपलब्ध याकेगु निर्णय यानागु खँ कनादीगु दु । महानगरं उपलब्ध याकीगु थुकथंया आर्थिक ग्वाहालिपाखें थनया जीवन्त सांस्कृतिक सहर निर्माणय् ग्वाहालि जुइगु अपेक्षा नं वय्कलं यानादीगु दु ।

येँ महानगर प्रमुख शाक्यं उगु खँ येँ महानगरपालिका वडा नं. २७ (साविक ३०)य् जूगु छगू ज्याझ्वलय् धयादीगु खः । महानगर प्रमुख शाक्यं २७ वडास्थित महाबौद्धय् पुनःनिर्माण सम्पन्न जूगु थीथी द्यःया देगःया उलेज्याझ्वलय् उगु खँ धयादीगु खः ।

ज्याझ्वय् वय्कलंं सम्पदा पुनःनिर्माणलिसें सन्तुलित रुपय् सहरी विकासया दक्वं पक्षयात महानगरं उतिकं बः बिया वयाच्वनागु खँ कनादिल । वय्कलं सम्पदा पुनःनिर्माणलिसें सन्तुलित रुपय् सहरी विकासया दक्वं पक्षय् महानगरं उतिकं बः बियाः ज्याझ्वः न्ह्याका वयाच्वनागु दु धयादिल ।

वडाअध्यक्ष चिनियामान वज्राचार्यं पुनःनिर्माण सम्पन्न जूगु देगःलिसे सम्बन्धित सांस्कृतिक व पुरातात्विक सम्बन्ध मालेगु जुइ धासें देगःया महत्वया विषययात कयाः जानकारी बियादीगु खः । वय्कलं न्हापा सतकया दथुइ लानाच्वंगु देगःयात व्यवस्थित यायेकथं आः सतकया सिथये थापना यानागु नं खँ कनादिल ।

२७ वडास्थित महाबौद्धय् च्वंगु १८ हाते गणेश, महाकाल भैरव व शनिदेवया देगः हालय् जक पुनःनिर्माण सम्पन्न जूगु खः । ३० वडाया आर्थिक ग्वाहालिइ उगु देगःया पुनःनिर्माण याःगु खः । करिब १० गू लख तका लागतय् निर्माण सम्पन्न जूगु देगः पुनःनिर्माणया निंतिं स्थानीय मित्र युवा क्लब, मिसा पुचः व टोल सुधार समितिं ग्वाहालि याःगु खः ।

ज्याझ्वलय् थीथी वडाया वडाअध्यक्ष, कार्यपालिकाया दुजःपिं व वडाया जनप्रतिनिधिपिनिगु सहभागिता दुगु खः ।