आइफोन–आइपडया डिजाइनरं त्वःतल एप्पल
एप्पलयात संसारय् म्हसीका बिइगु निंतिं प्रमुख भूमिका म्हितूम्ह बेलायती नागरिक सर जोनी आइभं एप्पल कम्पनी त्वःतूगु दु । एप्पल कम्पनीयात निगू दशक स्वयां अप्वः ई बियाः विश्वया दकलय् मूल्यवान कम्पनी दयेकेत ग्वाहालि याःम्ह बेलायती आइभं एप्पल त्वःताः थःगु हे कम्पनी चायेकेत्यंगु खँ धाःगु दु ।
आइभ एप्पलया चर्चित ब्रान्ड आइफोन, आइपोड, आइम्याकया कल्पनाकार खः । एप्पलया थुपिं उत्पादनय् आइभं हे डिजाइन याःगु खः । वयागु डिजाइनय् बजारय् वःगु आइफोन, आइपोड, आइम्याक थेंज्याःगु उत्पादनं हे एप्पलयात संसारया हे मूल्यवान कम्पनी दयेकाबिउगु खः ।
आइभं आः थःगु हे सिजर्नात्मक व्यवसाय सुरु यायेगु व उकिया न्हापांम्ह ग्राहक एप्पल हे जुइगु खँ धाःगु दु । आइभं ‘लभफ्रम’ नामं थःगु व्यवसाय सुरु यायेत्यंगु खः । एप्पलया प्रमुख टिम कुकं एप्पलयात पुनर्जीवन बीत वयागु भुमिकाया बारे न्ह्यथनादीगु दु । मेखे आइभं एप्पल त्वःतीगु जुइवं आइफोनया विक्री म्हो जुइ ला धयागु ग्याःचिकु एप्पलया शेयरधनीतय्के खने दयावःगु दु ।
आइभं सुरु यायेत्यंगु लभफ्रम बारे यक्व जानकारी पित बिउगु मदुनि, तर वं आः घडी थें म्हय् घाना जुइजिउगु प्रविधिइ थःगु ध्यान केन्द्रीत यानाच्वंगु थीथी समाचारय् पिहां वःगु दु । आइभया पासा व एप्पल वया सहयोगी जुयाच्वंम्ह मार्क न्युसनं नं लभफ्रमय् ज्या याइगु जूगु दु ।
आइभ सन् १९९६ य् एप्पलया आर्थिक अवस्था कमजोर जुयाच्वंबलय् डिजाइन स्टुडियोया प्रमुख जूम्ह खः ।
आइभं सन् १९९८ य् डिजाइन याःगु आइम्याक व सन् २००१ य् डिजाइन याःगु आइपोडं यानाः एप्पलया आर्थिक अवस्थाय् सुधार वःगु खः । आइभया हे नेतृत्वय् एप्पलं सन् २००४ य् आइपड मिनी, २००७ य् आइफोन, २००८ य् म्याकबुक एयर, २०१० य् आइप्याड, २०१५ य् एप्पल वाच व २०१६ य् एअरपोड हःगु खः ।
एप्पलया संस्थापक स्टिभ जब्सं छक्वः धाःगु खः, ‘एप्पलय् सुं जिगु आध्यात्मिक साझेदार दुसा व आइभ हे खः ।’आइभं थौंकन्हय् यानाच्वंगु ज्या मध्ये प्रमुख एप्पलया मुख्यालयय् दयेकाच्वंगु एपल पार्क खः । आइभं त्वःते धुंकाः एप्पलं वयागु थासय् तुरन्त सुयातं नियुक्ती मबीगु खँ धाःगु दु । एप्पलया कथं वयागु ज्या आः मेपिं निम्ह जानाः स्वइगु जुइ ।
LEAVE YOUR COMMENTS