नलगाड जलविद्युत आयोजना सुरु

येँ – नलगाड जलविद्युत आयोजनाया ज्या सुरु जूगु दु । विस्फोटक पदार्थ छ्यलेगु खँय् सेना व नलगाड जलविद्युत आयोजना दथुइ सहमति (एमओयु) जुइवं स्वला न्ह्यवनिसें दिनाच्वंगु ज्या सुरु जूगु खः । आः बाँधस्थल तक वनेगु लँ दयेकेगु निंतिं धमाधम विस्फोट ज्या न्ह्यायेधुंकूगु दु ।

सेनां सहमति मयासे विस्फोक पदार्थ मछ्यलेगु धायेवं स्वला न्ह्यवनिसें आयोजनास्थल तक वनेगु सतक दयेकेगु ज्या व डिपिआरया ड्रिफ्ट टनेल टेस्ट यायेगु ज्या दिनाच्वंगु खः । आयोजना व सेना दथुइ सहमति लिपा नलगाड नगरपालिका ७ य् च्वंगु दल्ली व चिमिरे ओडार लिक्कसं सतक दयेकेगु ज्या सुरु जूगु दु ।

अथेहे विद्युत उत्पादन गृहया भूमिगत सुरुङ्ग (ड्रिफ्ट टनेल) विस्फोट यायेगु ज्या सुरु जूगु खः । ४१० मेगावाट मत उत्पादन यायेगु लक्ष्य तयातः थ्व आयोजना दिनाच्वंबलय् जिल्लावासीत चिन्तित जुयाच्वंगु खः । थ्व आयोजना पाखें ६०० मेगावाट तक मत उत्पादन यायेफइगु खः ।

थ्वहे दथुइ आयोजनां पिकाःगु मत हयेगु निंतिं जाजरकोट, रुकम व डोल्पाय् दयेकेत्यंगु सव स्टेशनया निंतिं नं जग्गा अधिकरण ज्या सुरु यायेधुंकूगु खः धाःगु दु । जग्गा अधिग्रहण याःथाय् ४०० केभी प्रसारण क्षमताया दयेकाः वितरण केन्द्र दयेकेगु खँ धाःगु दु ।