वाइडबडीया ब्वयेके मफुगुलिं निगमय् आर्थिक समस्या

येँ – राष्ट्रिय ध्वजाबाहक नेपाल वायुसेवा निगमं वाइड बडी जहाज न्याःगु इलय् अनियमितता जूगु चर्चा जुयाच्वंगु हे इलय् निगमं आन्तरिक व्यवस्थापन व सेवा सुदृढीकरणया निंतिं युद्धस्तरं ज्या जुयाच्वंगु खँ धाःगु दु । जहाज न्याःगु इलय् सार्वजनिक खरीद व्यवस्था व निगमया विनियमावली अःखः ज्या याःगु धासें खरीद प्रक्रियायात कयाः संसदया सार्वजनिक लेखा समिति व अन्तर्राष्टिय सम्बन्ध समितिं तालुकदार मन्त्रालय व निगम पदाधिकारीयाके बयान कायेगु ज्या यानाच्वंगु दु ।

महालेखा परीक्षकया ५५ औं वार्षिक प्रतिवेदनं जहाज न्याःगु प्रक्रियाय् त्रुटी दुगु न्ह्यथनेवं लिपांगु इलय् थ्व विषया सडक निसें संसदीय समितिइ तक थ्यनाच्वंगु दु । जहाज न्याःगु प्रक्रियाय् छुं खोट मदुगु धासें निगमया अधिकारीतय्सं धाःसा स्पष्टीकरण बियाच्वंगु दु ।लछि न्ह्यवनिसें सञ्चार माध्यमतय्सं निगमया जहाजबारे थीथी समाचार पित बिया वयाच्वंगु दु ।

निगमं नकतिनि श्वेतपत्र जारी यानाः उच्च वित्तीय जोखिमय् लानाच्वंगु खँ धाःगु खः । निगमया कूल त्यासा ३९ अर्ब ३८ करोड व सम्पत्ति थ्यंमथ्यं ५० अर्ब दु । निगमं जहाज न्याःगु वापत छगू अर्ब १३ करोड त्रैमासिक ब्याज पुलाच्वंगु दु । जहाज न्यायेगु प्रक्रियाय् अनियमितता जूगु आशंका, व्यावसायिक योजनाया अभाव, जहाज ग्राउण्डेड यानातःगु आदि खँयात कयाः निगमया थौंकन्हय् तच्वःगु आलोचना जुयाच्वंगु दु ।

थ्वहे झ्वलय् निगमः निगलं वाइड बडी ए ३३०–२०० जहाज न्हूगु गन्तव्यय् ब्वयेकेगु निंतिं व प्रभावकारी बजारीकरणया निंतिं योजनावद्ध रुपं ज्या यानाच्वनागु खँ धाःगु दु । वाइड बडी जहाजयात जापान, चीनया लिसें छुं महिना लिपा हे दक्षिण कोरियाया सियोल व साउदी अरबया रियादय् ब्वयेकेगु तयारी जुयाच्वंगु खँ धाःगु दु ।

निगमया कार्यकारी अध्यक्ष मदन खरेलं वइगु फेबु्रअरीतकया दुने जापानया ओसाका व मार्च महिनाय् चीनया ग्वाङझाओ तक ब्वयेकेगु निंतिं प्रक्रिया न्ह्याकेधुनागु खँ धाःगु दु ।वय्कःया कथं फेबु्रअरी निसें जापानया ओसाकाय् वाःया स्वंगू उडान जुइसा थ्वयां लछि लिपा निसें ग्वाङझोओ नं वाःया स्वंगू उडान सुरु जुइ । जापानय् विमान ब्वयेकेगु निंतिं झिंन्यान्हु दुने कर्मचारी व्यवस्था यायेगु खँ नं वय्कलं धयादीगु दु ।

अथेहे व्यावसायिक ल्याखं जापानया राजधानी टोकियोया लिक्क लाःगु नारिता अन्तर्राष्ट्रिय विमानस्थल तक वइगु खुला दुने हे वाइड बडी ब्वयेकेगु खँ नं निगमं धाःगु दु । जापान लिसें ताःहाकःगु रुटय् न्हि १५ निसें १६ घण्टा वाइडबडी ब्वयेकेगु तयारी जुयाच्वंगु खँ निगमया अध्यक्ष खरेलं धयादीगु दु । थ्व झ्वलय् वय्कलं निगमया आर्थिक अवस्था सन्तोषजनक जूगु दावी नं यानादीगु दु ।

वय्कलं न्हापा २५ अर्बया व्यापार याना वयाच्वंगु निगमय् निगः वाइडबडी जहाज वयेवं थप २५ अर्बया व्यापार थप जूगुलिं आर्थिक असन्तुलन खनेदुगु खँ धयादिल ।
‘वाइड बडी न्हूगु गन्तव्यय् चले यायेमफुगुलिं आर्थिक समस्या वःगु खः । न्हूगु गन्तव्यय् ब्वयेगु सुरु जुइवं खुला दुने निगमया आर्थिक स्थिति नं सुधार जुइ धयागु खँय् जिपिं विश्वस्त दु ।

आः हे आँटे चायेमाःगु अवस्था मदु’ वय्कलं धयादीगु दु ।निगम संचालक समितिया दुजः जुयाच्वनादीम्ह संस्कृति, पर्यटन तथा नागरिक उड्डयन मन्त्रालयया सचिव कृष्णप्रसाद देवकोटां नं वाइड बडी जहाज ताःहाकःगु रुटय् ब्वयेकेगु निंतिं व्यावसायिक योजना ज्वनाः न्ह्याः वनाच्वनागु खँ धयादीगु दु । वय्कलं नं वाइडबडी याकनं हे जापान, चीन, दक्षिण कोरिया, रियाद लगायतया गन्तव्यय् ब्वइगु व बुलुुहुं युरोप तक ब्वयेकेगु खँ धयादीगु दु ।

थौंकन्हय् थ्व विमानं न्हूदिल्ली, कतारया दोहा, थाइल्यान्डया बैंक व हंगकंग तक उडान यानाच्वंगु दु । सचिव देवकोटाया कथं वाइड बडी थौंकन्हय् न्हिं खुघौ निसें च्याघौ तक उडान यानाच्वंगु दु । छवाःया दुने हंगकंगय् स्वन्हु, बैंककय् प्यन्हु व दिल्लीइ निन्हु ब्वयाच्वंगु दु । यात्रुतय् चाप स्वयां यक्व यात्रु दत धाःसा वाइडबडी व म्हो यात्रु दत धाःसा न्यारो बडी जहाज उडान जुयाच्वंगु खँ सचिव देवकोटां धयादिल ।

वाइडबडी १७ न्हु न्ह्यवनिसें ग्राउण्डेड

येँ – प्यला न्ह्यव निगमं न्यानाहःगु एयरबस ३३० जहाज झिन्हय्न्हु न्ह्यवंनिसें ग्राउण्डेड जुयाच्वंगु दु । लछि न्ह्यव कतारय् ब्रेकिङ सिस्टमय् समस्या खनेदुगुलिं सामान्य मर्मत यानाः नेपाः दुत हःगु विमानय् छुं ई लिपा हे ब्रेकिङ सिस्टम हे फेल जुइवं विमान ब्वयेके मफुगु खः । आः हाकनं थ्व विमानय् कार्गोया लुखा कोरे जूगु धासें अझ ब्वयेके मजिउनिगु खँ धाःगु दु ।

स्ववाः तक विमान मब्वयेकूगुलिं आः हाकनं विमान ब्वयेकेत पूवंक हे परीक्षण यानाः जक ब्वयेकेमाःगु खँ निगम व्यवस्थापनं धाःगु दु । थुकिया निंतिं एयरक्राफ्ट टुलिङ सिस्टम हे हयेमानिगु खँ धाःगु दु । स्ववाः तक ग्राउण्डेड जूगु विमान पूवंक परीक्षण यानाः जक ब्वयेके दइ ।

अथे जूगुलिं आः थ्व टुलिङ्ग सिस्टम मेसिन महयेकं जहाज ब्वयेके मफइगु खँ धाःगु दु । निगम व्यवस्थापनं जहाज न्यायेगुलिइ जक हथाय् चायाः उकियात आवश्यक पार्टपूर्जाय् ध्यान मबिउगुलिं यानाः हे थज्याःगु समस्या वःगु खँ धाःगु दु ।