कानूनया मिखाय् सकलें समान

येँ – प्रहरी महानिरीक्षक सर्वेन्द्र खनालं प्रहरीया मिखाय् सकलें नागरिक समान जूगु खँ धयादीगु दु । प्रहरी महानिरीक्षक खनालं कानून व कानून कार्यान्वयनया झ्वलय् प्रहरीया दृष्टिइ सकलें नागरिक समान जूगु खँ धयादीगु खः । समुदाय प्रहरी साझेदारी ज्याझ्वः अन्तर्गत प्रहरी प्रधान ज्याकुथिइ जूगु ‘प्रहरीलिसे छन्हुया दिं’ ज्याझ्वलय् नवासें वय्कलं उगु खँ धयादीगु खः ।

शिक्षाया गुणस्तर बांलाकेत व समाजय् शान्ति सुव्यवस्था कायम यानातयेत प्रहरी, विद्यालय व समाज नापं जानाः न्ह्याः वनेमाःगु खँय् नं वय्कलं बः बियादिल । लिसें भुखाय्, प्राकृतिक प्रकोप, विपद्, सतक सुरक्षा लगायतया सुरक्षाय् स्कुलं तकं सामान्य नियम दयेकाः लागू याना यंकेमाःगु महानिरीक्षक खनालया धापू दु ।

प्रहरी सकल नागरिकया मंकाः संगठन खः धइगु भावना जागृत यायेमाःगु खँय् नं वय्कलं बः बियादिल । ज्याझ्वलय् सेन्ट जेभियर्स स्कुल जोसेफ हाइस्कुल, काभ्या स्कुल, नन्दी स्कुल, ग्यालेक्सी पब्लिक स्कुल, श्री शान्ति विद्यागृह, युलियन्स स्कुल, हिमरश्मी हाइस्कुलया प्रधानाध्यापक, शिक्षक, कर्मचारी व विद्यार्थीतय् उपस्थिति दुगु खः।

 

सम्बन्धित बुखँ

LEAVE YOUR COMMENTS