ओली म्हं मफुगुलिं दाहाल चीन मवन

येँ – सी पथया अध्ययन व चीनया विकास अवलोकनया निंतिं खुइम्ह नेतात लिसें चीन वनेगु सत्तारुढ दलया नेपाल कम्युनिष्ट पार्टी (नेकपा) या अध्यक्ष पुष्पकमल दाहालया भ्रमण ज्याझ्वः अन्तिमय् वयाः रद्द जूगु दु ।

प्रधानमन्त्री लिसें पार्टीया मेम्ह अध्यक्ष केपी शर्मा ओलीया स्वास्थ्य अवस्था व पार्टी सञ्चालनया कार्यकारी अधिकार सहित जिम्मेवारीया कारणं दाहालं थम्हं सार्वजनिक रुपं घोषणा याःगु ज्याझ्वः रद्द याःगु खँ सूत्रं धाःगु दु । वंगु शुक्रवाः जक चीन–नेपाल मैत्री पत्रकार पुचलं ग्वसाः ग्वःगु ज्याझ्वलय् न्ववासें दाहालं चीन व नेपाः दथुया सम्बन्ध जनस्तर जक मखुसें राजनीतिक स्तरय् नं तसकं सुमधुर जूगु खँ धासें खुइम्ह दुजः दुगु पुचःलिसे थः चीन वनेत्यनागु जानकारी बियादीगु खः ।

दाहालया पुचः थ्वहे वइगु मंसिर २२ गते चीन वनेगु ग्वसाः दुगु खः । तर प्रधानमन्त्री ओली अस्पतालं डिस्चार्ज तिथि अझं अनिश्चित जूगु व लिसें थः कार्यकारी अध्यक्ष जुइधुंकाः पार्टीया आपालं ज्या पूवंकेमाःगु जूगुलिं भ्रमण रद्द याःगु खँ सूत्रं धाःगु दु । दाहाल चीन वनेगु निंतिं फुक्कं कथंया तयारी क्वचायेधुंकूगु खःसा लिपांगु इलय् वयाः दाहालं थःगु भ्रमण रद्द याःगु खँ नं सूत्रं धाःगु दु ।