घाघः जुल जिल्ला समन्वय समिति

यल – संघीय व्यवस्था ला लागू जुल । न्हूगु व्यवस्था कथं १४ गू अञ्चलया थासय् ७ गू प्रदेश वल । प्रदेशया चुनाव जुयाः थःथःगु सरकार नं सञ्चालन जुयाच्वंगु दु । तर देय् संघीय प्रणालीइ वंसां पुलांगु भौगोलिक इकाई जिल्ला छगू धाःसा न ल्ह्वयेगु, न फायेगु जुयाः ल्यनाच्वंगु दु ।
पुलांगु प्रशासनिक इकाईया रुपय् कायम जुयाच्वंगु जिल्लायात आः छु यायेगु धकाः अन्यौल जुयाच्वंगु दु । जिल्ला धइगु प्रशासनिक इकाई आः मदुसां जिल्ला दुने थीथी सरकारी निकायया समन्वय यायेगु धकाः ‘जिल्ला समन्वय समिति’ नांगु छगू निकाय खडा यानातःगु दु । उकिया अध्यक्ष छम्ह नियुक्त यानातःगु दु । तर ज्या याइपिं कर्मचारी धाःसा मदु । अले थ्व निकायं छु ज्या याइ धकाः आः तक किटान तकं मजूनिगु खँ धाःगु दु ।
थ्व निकायं छु छु ज्या यायेगु धइगु खँ थ्व सम्बन्धी नियम पिहां वल कि स्पष्ट जुइ धकाः धयातःगु दु । तर सरकारं आः थुकिया नियम हे दयेकूगु मदुनि । सु सु लिसे समन्वय यानाः ज्या यायेगु धकाः आः तक कार्यविधि तकं दयेकूगु मदुनि ।
‘न ज्या यायेगु नियम दु, न ज्या याइपिं कर्मचारी । अय् जूगुलिं थौंकन्हय् ज्याकुथी वयेगु, अले वनेगु जक जुयाच्वंगु दु’ येँ जिल्ला समन्वय समितिया अध्यक्ष सरिता दाहालं सञ्चार माध्यमतय्त धायेगु यानादीगु दु ।
देश संघीय प्रणालीइ वनाः प्रदेश सरकार व स्थानीय सरकार वयेधुंकाः आः जिल्ला समिति धाःगु निकाय म्वाःल धकाः गुलिस्यां धयाच्वंगु दुसा गुलिस्यां जिल्ला दुने जुइगु विकासया ज्याय् संयोजनकारी भूमिका म्हितेगु लागिं थ्व निकाय ल्यंका तयेमाः नं धयाच्वंगु दु ।

सम्बन्धित बुखँ

LEAVE YOUR COMMENTS