आः छेँज्याय् नं मत छ्यलादिसँ !

आः न्ह्यागु ज्याय् नं मत छ्यले फइगु प्राधिकरणया दावी

येँ – नेपाल विद्युत प्राधिकरणं उपभोक्तातय्त आः घरायसी प्रयोजनया निंतिं नं बिजुली हे छ्यलेत आह्वान याःगु दु । प्राधिकरणं नेपालय् पर्याप्त मत दुगु धासें आः विद्युतीय सवारी साधन छ्यलेत नं इनाप याःगु दु । प्राधिकरणया कथं थौंकन्हय् देय्न्यंकं १३०० मेगावाट मतया माग दु । उकथं हे आपूर्ति नं जुयाच्वंगुलिं आः लोडसेडिङ जुइगु सम्भावना मदु धासें छेँज्याय् समेत विद्युतीय सामग्री छ्यलेत इनाप याःगु खः ।

प्राधिकरणया उपकार्यकारी निर्देशक हरराज न्यौपानें ‘बीबीसी’ नेपाली सेवा लिसे खँ ल्हासें थौंकन्हय् नेपाः व भारत दथुइ मतया व्यापार व आदान प्रदान सहज जूगुलिं मत इनेगु ज्या सहज जुयाच्वंगु धासें अथे जुयाः हे थःपिंसं उपभोक्तायात छेँज्याय् तकं विजुली मत छ्यलेत इनाप यानागु खँ कनादिल ।

वय्कलं धयादी, ‘थौंकन्हय् मत इनेगु ज्या सहज जुयाच्वंगु दु, अथे जुयाः जिमिसं उपभोक्तायात नसा ज्वलं दयेकेत तक मत छ्यलादिसँ धायेगु अवस्था दु ।’मेखे जलस्रोत विश्लेषक रत्नसंसार श्रेष्ठं धाःसा प्राधिकरणं इनाप यायेवं उपभोक्तां नसा ज्वलं ज्वरे यायेत माःगु विद्युतीय सामग्रीइ थप लगानी याये फइगु अवस्था मदुगु खँ कनादीगु दु ।

वय्कलं धयादी, ‘थौंकन्हय् बर्खाया ई जुयाः मतया उत्पादन अप्वयाच्वंगु दु । तर चिकुला व सुख्खा यामय् मत उत्पादन म्हो जुइ । उगु इलय् फुकसित मत गाकेत थाकुइफु ।’विज्ञपिनिगु धापू कथं नेपालय् मतया गुलि फु उलि अप्वः उपभोग यात धाःसा इन्धन व ऊर्जाया लागि नेपाःया परनिर्भरता म्हो जुया वनी ।

उप कार्यकारी निर्देशक न्यौपानें काभ्रेय् जूगु छगू अध्ययन कथं विद्युतीय उपकरण छ्यलाः नसा ज्वलं ज्वरे यायेगु खःसा ग्याँस स्वयां म्हो जक खर्च जुइगु खँ कनादीगु दु । ग्याँसया थासय् मत छ्यलेबलय् न्हिं स्वतका स्वयां अप्वः दां बचत जुइगु खँ वय्कलं कनादीगु दु । नेपाल आयल निगमया कथं देय् दुने इन्धर व ऊर्जाया स्रोत मदुगुलिं वंगु आर्थिक दँय् थ्यंमथ्यं २ खर्बया पेट्रोलियम पदार्थ आयात याःगु दु ।

निगमया प्रवक्ता विरेन्द्र गोइतया कथं नेपालय् पेट्रोलियम पदार्थ आयात दँय् १० प्रतिशतया ल्याखं अप्वया वनाच्वंगु दु । सवारी साधनय् छ्यलीगु डिजेल व पेट्रोल जक मखु भुतुली छ्यलीगु एलपी ग्यासया आयात नं दँय्दसं अप्वया वनाच्वंगु दु । मत छ्यलाः नसा ज्वलं ज्वरे यायेगु जक मखु विद्युतीय सवारी साधन छ्यलेगु खःसा पेट्रोलियम पदार्थया आयातय् खर्बाैं तका बचे जुइगु सम्भावना दु ।