नेवाः विरोधी सरकार

दुई तिहाइ बहुमतया घमण्डी ओली सरकारं गुथि विधेयक हयाः येँया रैथाने नेवाःतय् ब्लड प्रेशर हाइ याना बिल । सरकारं सिउ हे जुइमाः स्वनिगःया नेवाःतय्गु ब्लड प्रेशर हाइ जुल कि सत्ता अले व्यवस्था हे हिलेयः । थ्व ला २०४६ सालया जनआन्दोलनं क्यने हे धुंकल । आः नं अथे हे स्वनिगःया नेवाःतय्गु प्रेशर हाइ यात धाःसा हाकनं २०४६ साल दोहरे जुइफु ।

नेपाःया कला, संस्कृति, सम्पदा, सांस्कृतिक म्हसीका नेपाःया हे म्हसीका खः अले नेपाःया सांस्कृतिक सम्पदा गुथि आदियात ल्यंका तयेमाः, सरक्षण यायेमाः धाइपिं नेवाःतय्त ओली सरकारं दमन यात । नेपाःया भूमि सम्पदा आदियात संरक्षण यायेमाः धाइपिंत छाय् लःया फोहरा व झीसं हे पुला तयागु करं न्यानाः न्ह्याका तःगु बूथ नेवाःतय् छ्यनय् बर्से यात ?

म्हिगःया इलय् भ्वाथःगु लं फिनाः चप्पल लाकां न्ह्यानाः येँया नेवाःतय्गु छँेया छ््रयलि छकुली बालं च्वनाः राजनीति याना जूपिं आः सत्ताय् थ्यनेधुंकल । अले सत्ताया मात लगे जुयाः थःत गाँस बास बिउपिंत थौ दमन यात । हिन्दी भाय्या छगू भनाई दु नि – जिस थालि मे खाया उसी मे छेड किया ।

यदि स्वनिगःया नेवाःतय्सं २०४६ सालया जनआन्दोलनय् साथ बियाः सफल मयाःगु खःसा आःया सत्ताधारी नेतात आः नं वहे नेवाःतय्गु छ्यलिइ बालं च्वनाच्वने मालीगु जुइ । स्वनिगलय् जग्गा न्यानाः निखा निखा छेँ दयेके फइ मखु जुइ । स्वनिगःया नेवाःतय्गु जग्गा जमिन, सांस्कृतिक सम्पदा लाकाः नेवाःतय्त गय् यानाः स्वनिगलं विस्थापित यायेगु धइगु हे नेपाःया शासकतय्सं चलखेल यायेगु यानाच्वंगु दु ।

चाहे राणाकालय् जुइमा, चाहे पञ्चायतकालय् छाय मजुइमा, राजतन्त्र हे छाय् मजुइमा वा बहुदलीय प्रजातन्त्र हे छाय मजुइमा लोकतान्त्रिक गणतन्त्र अले संघीय गणतन्त्र थ्व ज्यायात तीव्र कथं हे न्ह्याकाच्वंगु खनेदु । आः तप्यंक हे लाका काये मफइ थे च्वनाःलि थ्व लाका कायेया लागिं विधेयक हे हल धाःसां जिउ ।

झी पुर्खातय्सं पलिस्था याना थकूगु सम्पदा व म्हसीकायात हे विस्थापित यायेगु कुतः यात धाःसा न्ह्यागु हे राजनीतिक दलया नेता कार्यकर्तातय्सं नं आम नागरिकतय्त साथ बीमाः धयागु बुद्धि गबले वइगु खः थुमिके ?

अले थज्याःगु जनविरोधी सम्पदा विरोधी विधेयकया विरोध याइपिंत सरकारं दमन यात । स्वनिगःया नेवाःतय्गु सम्पति वा म्हसीका धइगु हे भाषा, कला, संस्कृति, सम्पदा, जग्गा जमिन, परम्परागत गुथि खः । तर वहे गुथि निजी जग्गा जमिन सार्वजनिक सम्पदात राज्य सरकार समेत जानाः भूमाफियातय्सं स्वत्तर यानाच्वनसा छम्ह नांजाःम्ह बैंकरं ला थँबहीया पलेस्वां पुखू स्वाहा यानाः अन भराय्खागु छेँ समेत निर्माण यायेधुंकल ।

आः ला झन् सरकारं हे विधेयक हयाः नेवाःतय्गु सम्पदा स्वत्तर यायेग दाउ म्हितल । अले थःगु गुथि सम्पदा सरक्षण याये धकाः सः थ्वयेकूपिंत सरकारं दमन यातसा अले देय्या गृहमन्त्रीं हे फटाहा फटाहा खँ ल्हायेगु नं याना हल । आःया ओली नेतृत्वया सरकारं दुई तिहाइ बहुमतया दम्भ क्यनाः आम नागरिकयात पेले यायेगु रणनीति दयेकाच्वंगु दु ।

गबलें मिडिया काउन्सिल विधेयक हयाः पत्रकारतय्त पेले यायेगु, गबलें गुथि विधेयक हयाः नेवाःतय्त पेले यायेगु ज्या यानाच्वन । अथेला नेवाःतय्त पेले यायेगु धाःसा उलि अःपु मजू । सत्ता व व्यवस्था हे हिलेगु तागत नेवाःतय्के दु । अथेला नेवाःतय् लागि विडम्बना हे धायेमाः गुथि विधेयकया विरोधय् आम नेवाःत दना वलं नं थीथी राजनीतिक दलय् लगे जुयाच्वंपिं नेवाः नेतात, नेवाःतय्गु मत कयाः त्याःपिं जनप्रतिनिधिपिं गन वं गन वं जुइक सुलाच्वन ।

उपिं राजनीतिक दलया ब्रम्हू नेतातय् झोला ज्वनाः जक लिउलिउ जुयाच्वन वन । राजनीतिक दलया नेवाः नेता वा कार्यकर्तातय् थःथःगु राजनीतिक दलप्रति आस्था दइ, थुकी निगू मत दइ मखु । तर आम नागरिक अले थः मतदाताय् सःयात नं ध्यान तयेमाः ।

झी पुर्खातय्सं पलिस्था याना थकूगु सम्पदा व म्हसीकायात हे विस्थापित यायेगु कुतः यात धाःसा न्ह्यागु हे राजनीतिक दलया नेता कार्यकर्तातय्सं नं आम नागरिकतय्त साथ बीमाः धयागु बुद्धि गबले वइगु खः थुमिके ? थःगु राजनीतिक दल वा सरकारं न्ह्यागु हे ज्या याःसां मिखा तिसिनाः समर्थन यायेगु धइगु थः मतदाताप्रति याःगु बेइमानी खः ।

थःगु बुद्धि विवेक छ््रयले मफुपिं नेतात बुद्धि भ्रष्टपिं खः । अथे ला राजनीतिक दलतय्सं नेवाःतय्त राजनीतिक रुपं विभाजित यानाः थःपिंसं लबः कायेगु ज्या यानाच्वंगु खनेदु । थ्व सत्य खँ खः । अय्नं थीथी राजनीतिक दलया नेवाःतय्सं वाःचायेके फयाच्वंगु मदु । अथेला नेवाःत नं ‘नेवाः एकता, नेवाः एकता’ धकाः हालाच्वन अय्नं नेवाः एकता धाःसा जुइ फयाच्वंगु मदु ।

येँ देय्या नेवाःत उखेथुखे लायेधुंकूगु दु । लिपांगु इलय् नेवाःतय् थःथिति पासा भाइ नापलायेत हे पूर्व–पश्चिम उत्तर–दक्षिण वने मालेधुंकल । यँे देय्यात देशी विदेशी आप्रवासीतय्सं त्वपुइ धुंकल । नेवाःतय्सं थःगु छ््रयलि छकू खाली जूसा बालं तयाः ध्यबा कमे यायेगु बाहेक मेगु सोच तयाच्वंगु खने मदु ।

अले येँ देय्यात आप्रबासीतय्सं त्वपुइगु ला स्वाभाविक हे जुल । अले थ्वया जिम्मेवार सु ले ? सरकार ? राज्य ? राजनीतिक दलत ? अथवा येँया स्थानीयवासी ? थीथी राजनीतिक दलत स्वनिगः पिनेयापिं आप्रवासीत खः । उमिगु लक्ष्य धइगु हे स्वनिगःया भूमि अतिक्रमण यायेगु, रैथाने नेवाःतय्गु भाषा, कला, संस्कृति, सांस्कृतिक सम्पदा, नखःचखःयात न्हंका छ्वयेगु खः ।

थुकी नेवाःतय्सं लाटां पापा स्वः थें स्वया जक च्वंगु दु । थ्व फुक्कया दथुइ आः जूगु गुथि विधेयक विरोधी आन्दोलनं नेवाःतय्त छकः हानं छप्पँ छधी जुयाः छथाय् च्वनेगु अवसर बियाच्वंगु दु । थ्व अवसरयात विधेयक लित कायेगु जक मखु, नेवाःत फुक्क वाद व सिद्धान्तयात त्वःताः नेवाःया लागिं छथाय् च्वने धइगु भावना नं विकास याना यंके फुसा थुकिया तःधंगु लबः दइ ।

सम्बन्धित बुखँ

LEAVE YOUR COMMENTS