बौद्ध चैत्य ल्ह्वनेज्या क्वचाल

ख्वप – थनया बौद्ध समकृत विहार परिसरय् च्वंगु बौद्ध चैत्य ल्ह्वनेज्या क्वचाःगु दु । ख्वप नगरपालिकाया प्रमुख सुनिल प्रजापतिं उगु चैत्यया उलेज्या यानादीगु खः ।चैत्य सम्पदा संरक्षण समितिया ग्वसालय् जूगु ज्याझ्वः पंचशील ग्रहण यासें न्ह्याःगु खः । ज्याझ्वलय् लसकुस यासें पद्मसुन्दर शाक्यं ख्वपया चैत्य व थीथी सम्पदाया संरक्षण व संवद्र्धनया निंतिं निजी ख्यलं जुयाच्वंगु कुतःयात स्थानीय तहपाखें नं तिबः दत धाःसा ख्वप देय्या हे शोभा अप्वया वनीगु विश्वास अप्वंकादि ।

चैत्य ल्ह्वनेज्याया निंतिं गठन यानातःगु समितिया संयोजक तीर्थराज वज्राचार्यं चैत्य संरक्षणया प्रतिवेदन न्ह्यब्वयादिसें मचांनिसें हे चैत्यया ज्ञान बी फत धाःसा उकिया लिच्वः नं बांलाःगु हे वइगु व चैत्यया संरक्षण लिपाथ्यंकं जुयाच्वनी धयादिल । लिसें वय्कलं ख्वप देय् दुने संरक्षण यायेमाःगु बौद्ध सम्पदात आपालं दुगु व उकिया निंतिं मैत्रेय युवा संघपाखें पूmचाःगु ग्वाहालि यायेगु प्रतिवद्धता नं प्वंकादिल ।

बौद्ध संघ ख्वपया नायः त्रिरत्न शाक्यं पुरातत्वविद्तय्सं न्ह्यब्वयादीगु ‘गन चैत्य, अन विहार’ धइगु अवधारणा विशेषतः ख्वप देय्या निंतिं सापेक्ष जूगु विचाः तयादिल । प्राध्यापक सिद्धिरत्न शाक्यं दकलय् न्हापां ख्वपया स्थानीय पहिचान क्यनेकथं तयार जूगु स्थानीय पाठ्यक्रमय् स्वांयाःपुन्हि, ख्वपया सम्यक, गुंला बाजं, पंचदान, लुँध्वाखा लगायत ख्वपया रहनसहन, संस्कृति बहाःबहीया विषययात नं थाय् बीगु विश्वास प्वंकादिल ।

ज्याझ्वलय् कुथुबही विकास समितिया उपाध्यक्ष रत्नबाबु वज्राचार्यं चैत्य जिर्णोद्वारया आय व्यय न्ह्यब्वयादिसें नगरपालिकां पिथंगु ब्रोसरय् बौद्ध सम्पदाया बारे गनं नं उल्लेख मजूगु खँय् नगरपालिकाया ध्यानाकर्षण याकादिल । नगरप्रमुख प्रजापतिं पूर्व वक्तातय्सं तयादीगु जिज्ञासायात कयाः थम्हं ध्यान बीगु जुइ धासें नियमकथं वइगु प्रस्ताव, योजना व ज्याझ्वःयात स्वीकृति बीगु जक मखसे माःगु ग्वाहालि नं यायेगु बचं बियादिल ।

विहारया सप्तचन्द्र वज्राचार्यया सभापतित्वय् जूगु ज्याझ्वलय् भिक्षु धम्माशोभन महास्थविर, ख्वप नपा १ वडाअध्यक्ष श्यामकृष्ण खत्रीं नं नुगःखँ तयादीगु खः ।थीथी बौद्ध चैत्य व सम्पदाया संरक्षण यायेगु ज्याझ्वःकथं विहारया चैत्य ल्ह्वनेज्या जूगु खः ।

 

सम्बन्धित बुखँ

LEAVE YOUR COMMENTS