पल शाहया मुद्दाय् मिसां बयान फेरे यात

येँ- बलात्कार मुद्दाय् प्रहरी हिरासतय् लानाच्वंम्ह कलाकार पल शाहया मुद्दाय् ट्विस्ट वःगु दु । शाहं बलात्कार याःगु धासें मुद्दा दायर याःम्ह नाबालिग मिसां थःगु बयान फेरे खँ पिहां वःगु दु ।

पेशां गायिका समेत जुयाच्वंम्ह उम्ह मिसां अदालतयात बिउगु बकपत्रय् पल शाहं थःत बलात्कार याःगु मखु धासें थम्हं अज्याःगु द्वपं गबलें मबियागु खँ नं धाःगु खँ सीदुगु दु ।

उम्ह मिसां थःत मेपिंसं उक्से याःगुलिं जक बलात्कारया द्वपं बियागु खः धासें थःत मेपिंसं च्वयाः बिउगु विवरण हे सारे यानाः प्रहरीयात लःल्हाना बियागु खः धकाः बयान बिउगु खँ नं सीदुगु दु । मिसाया पक्षं मुद्दा ल्वानाच्वंपिं वकिलतय्सं पलया छेँजःपिंसं मिसायात ह्ययेकाः बयान फेरे याकूगु खँ धाःगु दु । बयान फेरे यात धाःसा खुदँ तक जेल सजायँ जुइफु ।