फुटपाथय् तयातःगु मोटरसाइकल जफत
ख्वप (नेपालभाषा टाइम्स)- ख्वप नगरपालिकां नं सतक पेटी कब्जा यानाः तयातःगु पसःया सामान व मोटरसाइकलत जफत यायेगु शुरु याःगु दु । सतक पेटीइ व सर्भिस ट्रयाकय् गुगुं नं कथंया सवारी साधन मतयेत व व्यापार व्यवसाय मयायेत नगरपालिकां तःक्वःमछि निर्देशन बिलं नं अटेर याःगुलिं ख्वप नपां मोटरसाइकल सहित सामान जफत याःगु खः ।
नगरपालिकाया अनुगमन समितिया संयोजक राजकृष्ण गोराया नेतृत्वय् ख्वपया घलाते व चुनदेवी च्वंगु नीन्यागू पसल्यातय्सं पसः पिने तयातःगु सामान व मोटरसाइकल जफत याःगु खः ।
वय्कःया कथं अनुगमनया झ्वलय् ब्रदर्श रिकन्डिसन हबयात लँ व पेटीइ मोटरसाइकल मतयेत निर्देशन बिलं नं अटेर याःगुलिं अन मीत तयातःगु मोटरसाइकल जफत यानाः स्वन्हुया दुने नगरपालिकाय् हाजिर जुइत निर्देशन बिउगु खः ।
उकथं हे अमर बत्ती इन्टरप्राइजेज प्रालि, ख्वप हार्डवेयर प्रालि, खोटा खाजा घर, युनिस्टल ट्रेडर्स, बागमति आर्टस्, आरबी निर्माण सप्लायर्स, एभरेष्ट अटोटेक एण्ड सप्लायर्स व ह्वाक्सी फर्निचर (डेकोर) प्रालियात नं स्वन्हुया दुने नगरपालिकाय् हाजिर जुइत निर्देशन बिउगु दु ।
अथे हे म्याद सिधयेधुंकूगु सामान मियाच्वंगु कृष्ण किराना पसलय् च्वंगु पेय पदार्थ लिसें खाद्य पदार्थ नष्ट याःगु दुसा श्रीलाल कोसवारया ग्रिल पसः व वर्कसप, रिचा भुसालया किराना पसः, सुस्मिता श्रेष्ठया जलपान पसःयात नं अनुगमनया झ्वलय् नगरपालिकाय् दर्ता याकूगु दु ।
LEAVE YOUR COMMENTS