स्वयम्भूनिसें लुम्बिनीतक साइकल यात्रा

येँ-  स्वयम्भूया हारति अजिमा द्यःया थासंनिसें लुम्बिनीतक साइकल यात्रा न्ह्याइगु जूगु दु । वइगु फागुन २३ गते येँया स्वयम्भूस्थित हारति मांयाथासं लुम्बिनीतक उगु साइकल यात्रा जुइत्यंगु खः । नेवाः सभ्यता व शाक्य सभ्यता स्वायेगु अभियानकथं जुइत्यंगु साइकल यात्राय् विश्वस्तरया झिंप्यम्ह साइकल यात्रीं ब्वति काइगु थन जूगु पत्रकार सम्मेलनय् जानकारी बिउगु दु । थुगु अभियानयात ताःलाकेगु निंतिं पर्यटन व्यवसायी विक्रमकाजी पाण्डें आवश्यक व्यवस्थापन याना वयाच्वनादीगु दु ।

वकुन्हु हारति मांयाथाय् पुजा पुजा व दर्शन यानाः साइकल यात्रीत अनं हे लुम्बिनीया निंतिं प्रस्थान याइगु पत्रकार सम्मेलनय् जानकारी बिउगु दु । नेपाल भ्रमण वर्ष–२०२० या अवसर लाकाः स्वनिगःया नेवाः सभ्यता व पश्चिम नेपाःया शाक्य सभ्यता स्वायेगु अभियानकथं थुगु ज्याझ्वः यायेत्यनागु वय्कलं कनादिल । ३१० किलोमिटरया यात्रा पूवंकेत स्वन्हुया ई काइगु जानकारी बियादिसें सुं मेपिं नं अभियानय् सहभागि जुइत इच्छुक दुसा सहभागि जुइ फइगु नं वय्कलं कनादिल ।

अभियानय् ब्वति कायेत इच्छा दुपिंसं स्वीन्यासः व आवासीय बन्दोबस्तया निंतिं खु्द्वः तका शुल्क पुलेमाःगु व वइगु होलिपुन्हि छन्हु न्ह्यः ७७.७७ किलोमिटरया साइकल दौड प्रतियोगिता नं यायेगु जानकारी बियादिसें कासाय् न्हाप, लिउ व लियांलिउयात छसिकथं ७,७७७÷–, ५,५५५÷– व ३,३३३÷– तका दां सिरपाः नं बीगु पत्रकार सम्मेलनय् घोषणा यानादिल ।

सम्बन्धित बुखँ

LEAVE YOUR COMMENTS