नेवाः मन्त्री बारे भ्रम हुइमाःगु दु

येँ(नेपालभाषा टाइम्स)- नवनियुक्त संस्कृति, पर्यटन तथा नागरिक उड्डयन मन्त्री जीवनराम श्रेष्ठं नेवाःत नं मन्त्री जुयाः ज्या यायेफु धकाः क्यनेमाःगु ई वःगु दु धयादीगु दु । अथें नं नेवाःतय् उपस्थिति म्हो जक जुइगु व सरकारय् दुपिंसं ज्या नं याये मफु धकाः गुनासो वयाच्वनीगु कारणं आः नेवाःत नं मन्त्री जुयाः ज्या यायेफु धकाः क्यनेमाःगु ई वःगु वय्कलं धयादीगु दु । लिसें मन्त्री श्रेष्ठं सकल नेवाःतय्सं थःथःगु थासं ग्वाहालि यायेत नं इनाप यानादीगु दु ।

नेवाः पत्रकार राष्ट्रिय दबू येँ जिल्लापाखें ग्वसाः ग्वःगु वय्कःया हनाज्याझ्वलय् नवासें मन्त्री श्रेष्ठं उगु खँ धयादीगु खः । दबूया येँ कचापाखें वंगु बुधवाः ग्वसाः ग्वःगु हनाज्याझ्लय् नवासें वय्कलं थः मन्त्री जुयागु यक्व ई मदुनिगु नापं आपाः ई मन्त्री नं मजुइगुलिं म्हो इलय् खने दयेक ज्या यायेमाःगु दु धयादिल ।

स्वनिगःया म्हसीका धइगु हे थनया संस्कृति, सम्पदा जूगु व थ्व देय्या हे धरोहर जूगुलिं थुकिया उचित संरक्षण व संवद्र्धन यायेमाःगु खँय् बः बियादिल ।
मन्त्री नियुक्त जुइधुंकाः दकलय् न्हापांगु निर्णय हे पर्यटन क्षेत्रयात पुनःस्थापित यायेगु नापं स्वनिगःया सम्पदा ल्यंका तयेत सम्पदा मार्ग दयेकेगु निर्णय यानागु खँ कुलादिसें मन्त्रालयपाखें स्वनिगःया स्वंगुलिं जिल्ला स्वाइगु छगू विशेष सम्पदा मार्ग दयेकेत अध्ययन टोली हे दयेकाः ज्या न्ह्याकाच्वनागु नं वय्कलं कनादिल ।

सम्पदा मार्ग निर्माण जुल धाःसा उकिं स्वनिगलय् च्वंपिं नेवाःतय्त लजगाः चूलाइगु नापं थनया जात्रा, पर्व, संस्कृतियात नं ग्वाहालि दइगु विश्वास प्वंकादिल ।
दबूया येँ जिल्लाया नयाः अर्विन्द्रमान सिंहया सभापतित्वय् जूगु ज्याझ्वलय् मन्त्री श्रेष्ठलिसें येँ महानगरपालिका १५ वडाअध्यक्ष ईश्वरमाभन डंगोल वडा सदस्यपिं मैयालक्ष्मी महर्जन, अप्सरा खत्री, विजु श्रेष्ठ व रिता मिजारयात नं नेवाः परम्पराकथं ख्यें सगं बियाः भिंतुना देछाःगु खः ।

सम्बन्धित बुखँ

LEAVE YOUR COMMENTS