जापान–सेनेगल बराबरीइ, इंग्ल्यान्ड नकआउट चरणय्

एजेन्सी- होन्डा चले जुइवं थौं जूगु कासाय् जापानं सेनेगललिसे २–२ गोलया बराबरी याःगु दु । कासाया ७८ औं मिनेटय् केयुसुकी होन्डां गोल यासें कासा बराबरीइ हःगु खः । न्हापाया छगू छगू कासा त्याका तयेधुंकूगु जापान व सेनेगल थ्व बराबरी लिपा नकआउट चरणय् दुहां वनीगु सम्भावना अप्वःगु दु ।

थौं जूगु कासाय् ११ औं मिनेटय् साडिओ मानें जापानया गोलकिपर इजी कावासिमाया गल्तीया लबः कासें न्हापांगु गोल याःगु खः । तर २३ मिनेट लिपा ताकासि इनुई न्ह्यइपुक गोल यासें कासा बराबरीइ हःगु खः ।

कासाया ७१ औं मिनेटय् झिंगुदँया डिफेन्डर मोउसा वागं गोल यासें सेनेगलयात निगूगु चरणय् यंकेगु थ्यंमथ्यं पक्का यायेधुंकूगु खः । तर सब्स्टिच्यूटय् वःम्ह होन्डां थ्वयां ७ मिनेट लिपा हे गोल यासें हाकनं कासा बराबरीइ हयाबिल । समूह एच जापान व सेनेगलया आः ४–४ अंक जूगु दु ।

मेखे थौं हे जूगु न्हापांगु कासाय् इंग्ल्यान्ड पानामाविरुद्ध ६–१या प्रभावशाली विजय चूलाकुसें निगूगु चरणय् दुहां वंगु दु । थौंया कासाय् ह्यारि केनं ह्याट्रिक यासें थुगु विश्वकपय् दकलय् अप्वः गोल ल्याः थ्यंकूगु दु । थ्व ह्याट्रिक लिसें केनया न्यागू गोल थ्यंगु दु । केनं ट्युनिसिया विरुद्ध नं निगू गोल याःगु खः ।