किपुलिइ तलेजु देगः दनेगु तयारी

किपू – किपू नगरपालिकां किपुलिइ तलेजु भवानीया देगः दनेगु तयारी याःगु दु । किपू नगरपालिकां वडा नं. १ स्थित गुलक्वाः लागाय् लाय्कुलिइ तलेजुया देगः दनेगु तयारी याःगु खः ।

किपू नगरपालिकां किपू देय्या लाय्कूया छगू अ·या रुपय् दयाच्वंगु तलेजु देगः दनेगु तयारी याःगु खः । नगरपालिकां किपूया हे छगू कलात्मक रुपं दयाच्वंगु उगु थासय् तलेजुया देगः दनेगु तयारी न्ह्याकूगु खः । उगु क्षेत्रय् दक्षिण मोहदाय् किपू वडा नं. १या भवन दयेकेगु तयारी यायेवं नगर व स्थानीयवासी तलेजुया देगः दयेकेमाःगु खँय् चिउताः क्यना हःगु खः ।

नगरपालिकां गुलक्वाःया लाय्कू लागाय् तलेजु देगःया संरचना निर्माण यायेमाः धइगु जनभावनायात आत्मसाथ यासे उकिया निंतिं लाय्कू तलेजु अध्ययन समिति तकं गठन याःगु खः । वंगु मंसिर १२ गतेकुन्हु च्वंगु छगू मुँज्यां स्थानीय संस्कृतिविद् लिसें बुद्धिजीवि प्रयागमान प्रधानया संयोजकत्वय्् गठन याःगु अध्ययन समितिइ बुद्धिलाल ज्यापु, डा. वज्रमुनि वज्राचार्य, वीरप्रसाद भंसारी, भरत महर्जन, श्रीकृष्ण महर्जन, अर्जुन ‘नेपाःमि’ दुजलय् च्वनादीगु दु ।

समिति गठन लिपा मंसिर १६ गतेकुन्हु समितिया सकलें दुजःपिं नापं किपू नगरपालिका वडा न. १या वडाअध्यक्ष हर्ष महर्जन, २ वडाअध्यक्ष रमेशमान डंगोलसहितया छगू पुचलं येँ, यल, ख्वप, मध्यपुर थिमि लगायतया थीथी थासय् तलेजुया देगःया बारे स्थलगत अध्ययन याःगु खः ।

स्थलगत अध्ययन लिपा जनप्रतिनिधिसहितया समितिया पदाधिकारीतय् मुँज्यां किपूा वडा नंं १ लाय्कू लागाया गुलक्वाःया दक्षिण मोहदाय् यलया तलेजु दुहां वनेगु मूलुखाया लिधंसाय् तलेजु दयेकेमाःगु, दक्षिण मोहदाया भवन कलात्मक जुइमाःगु लुखाया त्वाथः जवंखवं निम्ह सिंह तयेमाःगु, उत्तर मोहदाय् लाइकथं वास्तुकलाया तलेजु देगः दनेमाःगु लगायतया थीथी सुझाव बिउगु खः ।

वंगु मंसिर २१ गते किपू नगरपालिकाया प्रमुख रमेश महर्जनयात वय्कःया हे कार्यकक्षय् उगु सुझाव लःल्हायेगु नापनापं ब्यापक सहलह नं याःगु खः । वयां लिपा प्रविधिकसहितया छगू पुचलं देगः निर्माण यायेगु विषयय् स्थलगत अवालोकन नं याःगु खः ।

नगर प्रमुख महर्जन, १ वडाअध्यक्ष, २ वडाअध्यक्ष, समितिया दुजःपिं व प्राविधिक पुचलं तलेजु देगः दयेकीगु थासय् स्थलगत अवलोकन याःगु खः । स्थलगत अवलोकन लिपा आः याकनं हे भवननापं कलात्मक डिजाइनया तलेजु देगःया संरचना निर्माण यानाः नक्सा तयार यायेगु व अनंलिपा देगः निर्माणया ज्या न्ह्याकेगु किपू नगरपालिकां न्ह्यथंगु दु ।

सम्बन्धित बुखँ

LEAVE YOUR COMMENTS