किपूया शहीदपिंत लुमंकल

येँ (नेपालभाषा टाइम्स)- २०४६ सालया जनआन्दोलनय् किपुली सहीद जूपिनि लुमंतिइ आइतवाः किपुली शहीद दिवस हंगु दु । ०४६ साल चैत २० गते प्रहरीया गोली लानाः किपुया लनबहादुर महर्जन, हिराकाजी महर्जन, राजमान माली व राजेन्द्र महर्जनं शहादत प्राप्त याःगु खः । वय्कःपिनि हे लुमन्तिइ दँय्दसं चैत २० गते किपुली शहीद दिवस न्यायेका वयाच्वंगु दु ।

थुगुसीया शहीद दिवसया झ्वलय् मभिं पुखुली तयातःगु वय्कःपिनि प्रतिमाय् स्वांमाः क्वखायेकाः छगू ¥याली जूगु खः । ज्याझ्वःया झ्वलय् किपू नगरपालिकां शहीद स्मृति व्यवस्थापन समितियात अक्षय कोषया निंतिं झिगू लाख दां नं लःल्हाःगु खः । नगरपालिका प्रमुख रमेश महर्जनं समितिया अध्यक्ष सिद्धिकुमार मानन्धरयात चेक लःल्हानादीगु खः । शहीदपिनि नामं थीथी ज्याझ्वः यायेगु निंतिं कोष नीस्वंगु खः ।

ज्याझ्वलय् वीर शहीदपिंत कयाः लोककवि राजभाई जकःमिं च्वयादीगु व हरिशरण साय्मिं लय् तयादीगु म्येँ नं सार्वजनिक याःगु खः । थ्व म्येँ किपुया म्येँ हालामिपिं राजेश महर्जन, हरिशरण साय्मि, रत्नशोभा महर्जन, रानीशोभा महर्जन व स्वस्ति महर्जनपिंसं सः बियातःगु दु ।