कर्णालीयात बुकाः जनकपुर फाइनलय्
किपू (नेपालभाषा टाइम्स)- जनकपुर बोल्ट्स नेपाल प्रिमियर लिगया फाइनलय् थ्यंगु दु । बिहिवाः जूगु क्वाालिफायर २ या कासाय् कर्णाली याक्सयात निगू विकेटं बुकाः जनकपुर बोल्ट्सं एनपिएलया फाइनलय् थाय् दयेकूगु खः ।
कर्णालीं बिउगु ११९ रनया लक्ष्य ज्वनाः मैदानय् वःगु जनकपुरं १९ औं ओभरय् थःगु लक्ष्य पूवंकूगु खः । जनकपुरया निंतिं उत्कृष्ट कासा म्हितूम्ह जेम्स निसमं दकलय् अप्वः ४५ रन दयेकूगु खः । १७ बलय् ४५ रन दयेकेधुंकाः निसम एनपिएलया हे दकलय् क्वकालिम्ह कासामि १६ दँ दुम्ह विपिन शर्माया बलय् बोल्ड आउट जूगु खः ।
जनकपुरया ओपनर ब्याट्सम्यानत शुभ कंसाकार ३ रन व आसिफ शेख ४ रनय् हे आउट जूगु खः । जनकपुरया निंतिं लाहिरु मिलान्थां २, आकाश त्रिपाठीं १३, हर्ष ठाकरें १७, मयन यादवं १४ व शेर मल्ल अविजित १६ रन दयेकूगु खः । कर्णालीया निंतिं विपिन शर्मां स्वंगू विकेट काःगु खः । अथेहे कप्तान सोमपाल कामी, विलियम बोस्टिटो व जिसन मक्सुदं छगू छगू विकेट काःगु खः ।
कासाय् न्हापा ब्याटिङ याःगु कर्णालीं निर्धारित २० ओभरय् ९ विकेटया क्षतिइ ११८ रन दयेकूगु खः । कर्णालीया निंतिं गुल्शन झां २० बलय् छगू चौका व निगू छक्का प्रहार यासें दकलय् अप्वः २५ रन दयेकूगु खः । अथेहे ओपनर देव खनालं स्वंगू चौका व छगू छक्का थ्वासें २४ रन दयेकलसा जिसन मक्सुदं १२, विलियम बोसिस्टों १४, चाडविक वाल्टनं ११ व उनिस ठकुरीं १२ रन दयेकूगु खः । मेपि कासामितय्सं निगू अंकया रन दयेकेमफुत । जनकपुरया निंतिं ललित राजवंशी, जेम्स निसम व मोहम्मद मोहसिनं निगू निगू विकेट काल । अथेहे हर्ष ठाकरे व शेर मल्लं छगू छगू विकेट काःगु खः ।
जनकपुर बोल्ट्सं आः फाइनलय् सुदूरपश्चिम रोयल्सलिसे म्हितीगु जुइ । जनकपुर व सुदूरपश्चिम दथुइ एनपिएलय् जूगु निगुलिं कासाय् सुदूरपश्चिमं त्याकूगु खः । क्वालिफायरय् सुदूरपश्चिमं जनकपुरयात च्यागू विकेटं व लिग चरणय् ७२ रनं बुकूगु खः ।
LEAVE YOUR COMMENTS