ने. सं. ११४६ बछलाथ्व पञ्चमी - दयावीरसिं बुदिं

गथांमुगः चःह्रेयात कयाः संस्कृतिविद्-पत्रकार दथुइ अन्तक्रिया

ख्वप – नेवाःतय् तःजिगु व मौलिक संस्कृति गथांमुगः चःह्रेयात कयाः ख्वपय् छगू अन्तक्रिया जुल । नेवाः पत्रकार राष्ट्रिय दबू ख्वप कचाया ग्वसालय् संस्कृतिविद् व पत्रकारतय् दथुइ उगु अन्तक्र्रिया जूगु खः ।‘ख्वप जिल्लाया संस्कृतिक पर्व’या विषयय् जूगु अन्तक्र्रियाय् संस्कृतिविद् प्रा. डा. पुरुषोत्तमलोचन श्रेष्ठं विश्व श्रेणीइ मूर्त व अमूर्त नेवाः संस्कृतिमध्ये दकलय् न्हापांखुसी वइगु गथांमुगः चः¥हे वैज्ञानिक व प्राकृतिक रुपं मनूतय्त स्वच्छ यायेगु ल्याखं माने याना वयाच्वंगु नखः खः धयादिल ।

वय्कलं भूत, द्यः? भिं–मभिं, मनू वा जनावरया दक्वं हे गुण मानवीय प्रवृत्तिया जूगु खँ न्ह्यथनादिसें भूतं भूतेश्वर महाद्यः व चण्डालं चण्डेश्वर महाद्यः उत्पन्न जू थें गथांमुगः नं भूत वा द्यःया हे प्रतीक खः धयादिल ।पत्रकारतय्सं न्यंगु न्ह्यसःया लिसलय् वय्कलं बौद्ध, हिन्दू, शैव नाथ सम्प्रदायमध्ये थुगु नखः गुगु सम्प्रदायया खः धकाः ब्याख्या यायेगु स्वयां नं उत्कृष्ट व विश्वस्तरया धर्म–संस्कृति दुगु नेवाः धर्म संस्कृतिइ दक्वं हे समुदाययात कःघाना वने फुगु शक्ति दु धयादिल ।

संस्कृतिया अध्ययेता राजेन्द्र तुबञ्जाः श्रेष्ठं नेवाः संस्कृति विज्ञान सम्मत, व्यवस्थापन सम्मत, आस्था व विश्वास सम्मत, मनोरञ्जन व व्यवस्थालिसे नं सम्बन्धित जूगु दसु न्ह्यब्वयादिल । पत्रकारतय् जिज्ञासायात कयाः वय्कलं मध्यपुर थिमिइ न्यायेकीगु बिस्कंकथंया गथांमुगः चः¥हेया बारे जानकारी बियादिसें वय्कलं पुलांगु थिमिइ झिंनिम्ह गथांमुगः दयेकेगु चलन दुगु, लाय्कुलिं उत्तरपाखे न्याम्ह व नगदेश व बोडेय् छम्ह छम्ह गथांमुगः दयेकेगु चलन दुगु जानकारी बियादिल ।

जीविकोपार्जनया निंतिं मेहनत यायेमाःगु इलय् अनेकथंया ल्वचं कये फुगुयात ध्यानय् तयाः थुगु नखः हनेगु याःगु व थ्व नखःया महत्व बिस्कं दुगु अध्ययता श्रेष्ठया मान्यता दु ।ज्याझ्वलय् दबूया केन्द्रीय नायः श्रीकृष्ण महर्जनं कृषि कर्म व जीवन पद्दतिनाप स्वाकाः स्वयेमाःगु झीगु थीथी नखःचखःयात धर्मलिसे स्वानाः ब्याख्या यायेगु प्रवृत्ति अप्वया वनाच्वंगुलिं मनूत अलमलय् लाःगु खँ कनादिल ।

दबूया ख्वप कचाया नायः रामगोपाल तमखुया सभापतित्वय् जूगु ज्याझ्वलय् दबूया येँ कचाया नायःलिसें वरिष्ठ फोटो पत्रकार नातीकाजी महर्जन, केन्द्रीय छ्यांजे केके मानन्धर, पत्रकार कृष्ण प्रजापति लगायतं थीथी न्ह्यसः न्यनादीगु खः ।