शिकागोय् नं मिजलया पितब्वज्या
येँ – बाखं च्वमि हितकरवीर सिंह कंसाकारया अंग्रेजी भासं भाय् हिलाः पिहां वःगु बाखं सफू ‘मिजला’या पितब्वज्या अमेरिकाया शिकागो सहरय् जुल । वंगु शनिवाः नेवाः अमेरिकन दबूया ग्वसालय् शिकागों ग्वसाः ग्वःगु नेवाः गुँभ्वय्या झ्वलय् अंग्रेजी अनुवाद जूगु बाखं सफूया पितब्वज्या जूगु खः ।
नेपालभाषा पिहां वःगु कंसाकारया बाखं सफू प्रा. डा. तेजरत्न कंसाकारं अंग्रेजीं अनुवाद यानादीगु खःसा उगु सफू शिकागोय् जूगु ज्याझ्वलय् नेपाःया कन्सुलेट जनरल मार्भिन ब्रस्टीनं उगु सफूया पितब्वज्या यानादीगु खः । थ्व स्वयां न्ह्यः मूपाहां कन्सुलेट मार्भिनयात दबूया नायः उदय महर्जनं लसकुस यानादीगु खःसा लिउ नायः श्रद्धाकमल ताम्राकारं सफू लःल्हानादीगु खः ।
बाखं च्वमि कंसाकारया म्हसीका सोनाम महर्जनं बियादीगु ज्याझ्वलय् सुषमा श्रेष्ठं सुभाय् देछानादीगु खः । सत्या स्वयां अप्वः मनूतय् सहभागिता दुगु ज्याझ्वलय् अन उपस्थित जूपिंत सफू इनेगु ज्या नं जूगु खःसा बाखं च्वमि कंसाकारया लोकंह्वाःगु बाखं नं ब्वनाः न्यंकूगु खः ।
LEAVE YOUR COMMENTS