अमर व सरिताया म्ये ‘छंगु ल्युल्यु’ पिदन

येँ (नेपालभाषा टाइम्स)- म्येहालामि अमर चित्रकार व सरिता महर्जनया नेपालभाषाया म्ये ‘छंगु ल्युल्यु’ सार्वजनिक जूगु दु । मूपाहाँ वरिष्ठ कलाकार मदनकृष्ण श्रेष्ठं सार्वजनिक यानादीगु थुगु म्येया संगीतकार व संगीत संयोजक भूपेन्द्र बज्राचार्य खःसा म्ये च्वमि अमर चित्रकार खः । ज्योति रेकर्ड्सय् रेकर्ड जूगु उगु म्येया प्रचारात्मक ज्याझ्वःया झ्वलय् मूपाहां श्रेष्ठयात दोसल्ला न्ययेकाः हनेज्या याःगु खः ।

म्येहालामि सरिता महर्जनं दोसल्लां न्ययेकादीगु खःसा आरबी डाइमण्ड ज्वेलरीया सीईओ रिकेन महर्जनं मतिनाया चिं लःल्हानादीगु खः ।

आरबी जेम एण्ड ज्वेलरी प्रा.लि.या निर्देशक रिजु महर्जनया सभापतित्वय् जूगु ज्याझ्वलय् म्ये व म्युजिक भिडियो दयेकेगु ज्याय् सक्रिय योगदान यानादीपिंत मतिनाया चिं लःल्हाःगु खः ।

थ्व म्युजिक भिडियोया निर्देशन रवि साय्मिं यानादीगु खःसा कोरियोग्राफी कृष्णभक्त महर्जनं, छायांकन, सम्पादन व कलर संयोजन अमर चित्रकारं यानादीगु खः । अथेहे म्युजिक भिडियोय् मनोज महर्जन, नेरिसा महर्जन, कृष्णभक्त महर्जन, निश्चल भुजेल, सुबरिना चित्रकार लगायतया कलाकारपिंसं अभिनय यानादीगु दु ।