कुतः राजदास साहित्य सिरपा लःल्हात
ख्वप – ख्वपय् प्यंगू दशकया इतिहास दुगु कुतः पिकाक प्रकाशनपाखें थीथी विधाय् च्वयातःगु न्हय्गु सफूया पितब्वज्या याःगु दु । थथे पितब्वज्या जूगु सफुतिइ समालोचक अपर्णा प्रधानया न्हायकं, जिज्ञासा व म्हमस्यूम्ह मनू नापं यानाः स्वंगू सफू अले आख्यानकार मथुरा साय्मिया महाअभियान, बाखं च्वमि पशुपतिमान पःमांया नेवाः वाउँभतु व मलखं कःगु छेँ नापं यानाः निगू सफू व पूर्ण ताम्राकारया कवि सुन्दर मधिकर्मी नांयागु सफू पितब्वज्या याःगु खः ।
थथे पितब्वज्या जूगु सफू मध्ये महाअभियान सफू अंग्रेजी, नेपाली व नेपालभाषा नापं यानाः स्वंगु भाषां पिदंगु सफू खः । ज्याझ्वःया न्हापांगु चरणमा सफू पितब्वज्या, अनंलि कुतः राजदास साहित्य सिरपाः लःल्हायेगु व संगीत , साहित्य क्षेत्रय् योगदान दुपिं व्यक्तित्वयात सम्मान याःगु खः । सिरपा त्याकूपिं न्याम्ह साहित्यकार मध्ये निबन्धकार पूर्णराम मुनंकर्मीयात नगद न्यय्द्वःतका सहित कुतः राजदास साहित्य सिरपाः लःल्हाःगु खः ।
च्वमि मुनकर्मीया अनुसन्धानमूलक सफू संवत् सन्दर्भ छगू दुवालाया लागि उत्कृष्ट सिरपाः लःल्हाःगु खः । अथेहे तुं म्हतिं झिद्वःतका सहित कुतः राजदास साहित्य हःपाः सिरपा छसिकथं उपन्यासकार डा. रीना तुलाधर, बाखं च्वमि पशुपतिमान पःमां, हाइजिन मोक्षबहादुर अमात्य व समालोचक अपर्णा प्रधानयात लःल्हागु खः । मुक्कं पीछगू सफू दुथ्याःगु मध्ये उत्कृष्ट न्याम्ह साहित्यकारया सफुलिं सिरपाः त्याकूगु खः ।
नेपालभाषा एकेडेमीया सदस्य सचिव डा. पुष्पराज राजकर्णिकार व समालोचक पूर्ण ताम्राकार जानाः सिरपलया निंतिं मूल्यांकन याःगु खः ।
भाषा सेवी पंचबीर सिंह तुलाधरया सभापतित्वय् जूगु ज्याझ्वःया स्वंगूगु चरणय् साहित्य व संगीतख्यलय् योगदान दुपिं व्यक्तित्वपित सम्मान नं याःगु खः ।
सम्मानया ज्याझ्वलय् नांजाःम्ह साहित्यकार मथुरा सायमिं संगीतपाखेया सम्मान जनगायक रामकृष्ण दुवाल व साहित्यपाखेया सम्मान साहित्यकार विमल ताम्राकारयात लःल्हाःगु खः । उकुन्हु बिउगु राजदास साहित्य सिरपाःया दाता केमिकल इन्जिनियर तथा भाषासेवी राजदास श्रेष्ठ खः ।
LEAVE YOUR COMMENTS