देय् धइगु चा जक मखु मन नं खः !
‘मधुपर्क’ सम्मान ज्याझ्वः हालय् सम्पन्न जुइ । गोरखापत्र संस्थानया सह प्रकाशन खः । मधुपर्कया संयोजक अभयजीया फोन वइ । सम्मान ज्याझ्वलय् वयेत ब्वनी । जि वने । जि वने न्ह्यः हे जिं मधुपर्क ब्वने धुन । ‘मधुपर्क’य कवि सुरेश किरणया कवितात वयाच्वंगु दु । थुगुसीया ‘मधुपर्क प्रतिभा पुरस्कार’ नेपालभाषाया प्रतिभाशाली कवि सुरेशयात बीगु क्वःछिउगु खबर ब्वने ।
लय्ताः । छखें गाक्क लय्ताः वइ । मेखेर अजू नं चाये । ‘मधुपर्क’ सरकारी पत्रिका । गोरखापत्रया सह प्रकाशन । सरकारी नीतिकथं संचालन जुइगु पत्रिका । अझ खस् नेपालीभाषीतय् बर्चस्व दुगु थाय् । राज्यया प्रकाशन जुयाः हे नं देशवासी सकलें साहित्यकारतसें ‘झीगु नं खः’ धकाः अपनत्व अनुभव याये मफइगु स्थितिइ लानाच्वंगु ‘मधुपर्क’ ।
आश्चर्य ! मधुपर्कया सम्मान ज्याझ्वलं आकस्मिक क्रमभंगया अनुभूति बी । ‘मधुपर्क’ आः देय्या सक्कलिगु मूलधारया साहित्यिक पत्रिका जुइ । विश्वास थनी । ‘मधुपर्कं’ आः देय्या गुगुं भाषा, साहित्यया प्रतिभायात लुमंकी । कदर याइ । धुक्क जुइगु वातावरण थनी ।
नेपालभाषाया नांजाःम्ह कवि सुरेश किरण जक मखु, खस् भासं च्वयाः नं थःगु तिख्खरगु प्रतिपक्षीय व्यक्तित्व स्थापित यायेधुंकूम्ह मय्जु सरिता तिवारीयात नं ‘मधुपर्क प्रतिभा पुरस्कार’ बियाः हनी । अथे हे तराई क्षेत्रया आख्यानकार राजेन्द्र विमलजुयात नं ‘मधुपर्क सम्मानं’ हनी । थुगु दँया चयनं जरुर नं जनमानसय् न्हूगु अनुभूति थनी ।
थौं गुथिया खँयात कयाः कोलाहल न्यनाच्वंगु दु । जनतायात सरकारं क्वां क्वां हायेकाच्वंगु दु । सामन्तवाद किसानतय्त शोषणया खँ हयाः राजनीतिक सैद्धान्तिक कासा म्हितेत स्वयाच्वंगु दु ।
‘मधुपर्क’ रुढ परम्परा, संस्कारं पिहां वयेत तत्पर । न्हूगु इतिहास शुरु यायेत आतुर धइगु सन्देश प्रवाहित याइ । ज्याझ्वलय् प्रतिभा पुरस्कारं सम्मानित कवि सुरेश व कवि सरिता थःपिं प्रतिभा पुरस्कारं सम्मानित जुइत्यंगु बुखं अजू चाःगु खँ प्वंकी । ‘मधुपर्क’य् थःथःगु रचना प्रकाशित यायेगु गबलें अवसर चूमलाःसां प्रतिभा पुरस्कार प्राप्तिया अवसर चूलात ।
थ्व तथ्यं निम्हं विस्मित जूगु खँ थःथःगु न्वचुइ प्वंकल । तर गोरखापत्रया कार्यकारी अध्यक्ष कृष्णमुरारी भण्डारीजुं कवि सुरेश व कवि तिवारीयात ‘मधुपर्कं’ हनागु वय्कःपिनिगु प्रतिभा, सिर्जनशीलताया कलायात खः धकाः प्रष्ट याइ । देशय् आः गुगुं नं भाषाया विचाःया प्रतिभाशाली, सिर्जनशील व्यक्तितय्त मधुपर्कं सम्मानित याइ ।
आश्वस्त याइ । ‘मधुपर्क’ धाथें थःगु थ्व अठोटयात कायम यानाः न्ह्याः वने फुसा थ्व छगू ऐतिहासिक पलाः जुइ । जिगु छपु कविता लुमनी । ‘देय् धइगु चा जक मखु, मन नं खः’ । गन मन कुचा कचा दली, देय् छधी जुइ फइमखु । थौं देय्यात एकताया नामय् ‘चा’ जक खंकीपिं दु । थःगु बर्चस्व कायम यायेया लागि कर्किया मनयात पर्वाह मयाइपिं दु ।
कुचा कुचा थलाः चुं चुं थलीपिं दु । उकिं थन देय् थौं पिनें नक्सा जक जुइ , देशवासीतय् मन कुचा कुचा दनी । मानसिक रुपय् देय छ्याछ्या जुइ । थःगु शक्तियात निरन्तरता बीगु महत्वकांक्षां जनताया नुगःयात खण्डित यानाः सिमान्तकृत यायेत स्वइपिंत ‘मधुपर्क’या थुुगु दँया सम्मान ज्याझ्वः जरुर नं छगू सबक जुइ ।
धाइ देय् चा जक मखु, मन नं खः । मनं मप्याःगु देय्, फुस्लु जुइ । मधुपर्क सम्मान ज्याझ्वलं देशवासी साहित्यकारतय् मन स्वायेगु पलाः छिउगु दु । थ्व अनुकरणीय जुइ । थौं । देशय् पिनें तःधंगु राजनीतिक गतिविधि खने दइ । अनेक राजनीतिक सिद्धान्तया हौवा सृजना याइपिं नं दइ । तर, धाथें धाये माल धाःसा देय् थौं राजनीतिविहीन ।
शून्य । सिद्धान्त, विचाः केवल नकाबया रुपय् खने दइ । अनेक भ्रम सृजना यानाः गथे यानाः शक्ति संचय यायेगु, शक्ति प्राप्त यानाः गथे यानाः थःगु स्वार्थ सिद्ध यायेगु, मेपिंत दमन यायेगु । देशय् थौं नेतातयसं पिनें सैद्धान्तिक वैचारिक खँ हइ । यथार्थय् थःत विशेष शासकवर्ग खंकीपिंसं जनतायात ध्वं लानाः शासनसत्ता ल्हाती लाकी ।
राष्ट्रियताया हल्ला याइ । तर जनताया मन स्वायेगु ज्या याइ मखु । थौंकन्हय् देशय् गुथिया खँयात कयाः कोलाहल न्यनाच्वंगु दु । आम जनतायात सरकारं क्वां क्वां हायेकाच्वंगु दु । सामन्तवाद किसानतय्त शोषणया खँ हयाः राजनीतिक सैद्धान्तिक कासा म्हितेत स्वयाच्वंगु दु । थौं देसय् सैद्धान्तिक, वैचारिक, राजनैतिक इमान्दारिता नेतातय् नकाब जक खः ।
नकाबधारीत थःगु जातीय बर्चस्व कायम यायेत मेमेगु जाति, जातीय संस्कृति, सम्पदायात तहसनहस यायेत कार्यरत जुइ । देय् धइगु चा जक मखु, मन नं खः । मन कुचा कुचा थलकि देय् नं छधी जुइ फइमखु ।
LEAVE YOUR COMMENTS