जगतसुन्दरय् लिपि च्वज्या कासा

येँ – जगतसुन्दर ब्वनेकुथिइ निक्वःगु अन्तर विद्यालयस्तरीय नेपाल लिपि च्वज्या धेंधेंबल्लाः कासा जुल । ब्वनेकुथिया हे ग्वसालय् जूगु लिपि च्वज्या कासाय् झिगू ब्वनेकुथिया विद्यार्थीपिंसं ब्वति काःगु खः । स्वीस्वम्ह विद्यार्थीं ब्वति काःगु कासाय् सुमनकृष्ण महर्जन (हिमालय मा.वि.) न्हाप, कृति नकःमि (जगतसुन्दर ब्वनेकुथि) लिउ व किरण मगर (प्रभात मा.वि.) लियांलिउ जुयादीगु खः ।

ब्वनेकुथिया संचालक समितिया दुजः विष्णु चित्रकारया सभापतित्वय् जूगु ज्याझ्वलय् लिपि च्वज्या कासाय् सिरपाः त्याकादीपिं व ब्वति कयादीपिंत मूपाहां कायबहादु नेपाली ब्यञ्जनकारं दसिपौ लःल्हानादीगु खःसा पाहांकथं झायादीपिं नेवाः अर्गनाइजेसन अफ नेपाल (एनओए)या नेपाः प्रतिनिधि किरणकेन रंजित, नेपालभाषा टाइम्सया उदेन न्हूसाय्मिं कापि व सफू लःल्हानादीगु खः ।

अथे हे न्हाप, लिउ व लियांलिउ लाःपिंत म्हतिं ट्रफिलिसें म्हतिं न्यासः तका दां दाता धर्मदेवी महर्जनं लःल्हानादिल । कासाय् थीथी स्कुलय् आखः ब्वनाच्वंपिं नेवाः बाहेकं तामाङ, मगर, शाह, गुप्ता, रौनियार समुदायया नं नं सहभागिता दुगु खः । ब्वनेकुथिया प्रिन्सिपल सुनिता मानन्धरं लसकुस यानादीगु उगु लिपि च्वज्या कासाय् नेपाल लिपि गुथिया न्वकु अनिल स्थापित निर्णायककथं च्वनादीगु खःसा कासा मणिराज मानन्धरया संयोजनय् जूगु खः ।

सम्बन्धित बुखँ

LEAVE YOUR COMMENTS