धरहराया विवादित जग्गा खाली यायेत मनपां ग्वाहालि मयाःगु द्वपं

येँ – थनया धरहरा न्ह्यःनेया जग्गा विवादय् येँ महानगरपालिकां सर्वोच्च अदालतया फैसला कार्यान्वयनय् ग्वाहालि मयाःगु खँय् जग्गा थुवाःतय्सं दुःख प्वंकूगु दु । जग्गा थुवाः रत्नकाजी महर्जन व जुजुकाजी महर्जनं छगू पत्रकार सम्मेलन यासें प्रधानमन्त्री आदेश कथं संघीय मामिला तथा सामान्य प्रशासन मन्त्रालयं नं येँ महानगरपालिकायात ताकेता यानहःसां महानगरपालिकां धाःसा थःपिनिगु नामय् दुगु जग्गा गैरकानुनी रुपं दनातःगु छेँ थुनेगु निंतिं ग्वाहालि मयाःगु खँ धाःगु दु ।

येँ महानगरपालिका २२ वडाय् लाःगु कित्ता नं. १८४१ व १८४२ या ६ आना १ पैसा २ दामया उगु जग्गाय् न्हापां निसें मस्जिद तयातःगु दावी यासें छथ्वः मुस्मांतय्सं कब्जा याना वयाच्वंगु खः । तर जिल्ला अदालत, पुनरावेदन अदालत निसें सर्वोच्च अदालतं तकं उगु जग्गा रत्नकाजी महर्जन व जुजुकाजी महर्जनया नामय् दुगु फैसला यानातयेधुंकूगु दु ।

सर्वोच्च अदालतया पूर्ण इजलाशं २०६९ सालं हे उगु जग्गा महर्जन दाजुकिजापिनि नामय् हे जूगु परमादेश जारी यायेधुंकूसां स्थानीय सरकार व स्थानीय प्रशासनं ग्वाहालि मयाःगुलिं थःपिंसं थःपिनिगु जग्गा हे भोगचलन यायेमखंगु खँ वय्कःपिंसं धयादीगु खः ।

पत्रकार सम्मेलनया झ्वलय् मुस्लिम आयोगया अध्यक्ष समिम मिया अन्सारीया दबाबं येँ महानगरपालिकाया प्रमुख व प्रमुख प्रशासकीय अधिकृतं हे उगु जग्गाय् गैरकानुनी रुपं दनातःगु संरचना थुनेत ग्वाहालि मयाःगु द्वपं नं वय्कःपिंसं बियादीगु खः ।

वय्कःपिंसं थुगु जग्गा सावित्रि तिमिल्सिनापाखें न्याना काःगु खः, तर अन च्वनाच्वंपिं मुस्मांतय्सं उगु थाय् राणा इलय् हे मस्जिद दयेकेत बिउगु धकाः दावी याना वयाच्वंगु खः ।

तर उगु जग्गा न्हापा खसी लहीगु निंतिं मुग्लानं वःम्ह छम्ह मुस्मांयात राणातय्सं बिउगु व आःतक जूगु गुलि नं मुद्दाय् प्रतिवादी पक्षं हे उगु थाय् खसि मीगु थाय् धकाः मुद्दा याना वयाच्वंगु खँ न्ह्यथँसें जग्गाथुवाः रत्नकाजी महर्जनं न्हापा फुसा व्यक्तिगत नामय् हे जग्गा थःपिनिगु नामय् कायेत स्वःगु खःसां अदालतया आदेशं जग्गा कायेमफुगुलिं आः मस्जिद थुगु थाय् धकाः विवाद हयाच्वंगु खँ धयादीगु दु ।

सम्बन्धित बुखँ

LEAVE YOUR COMMENTS