ने. सं. ११४४ ञलाथ्व दशमी -

नेपालभाषाय् उत्कृष्ट ल्याः हःपिंत मोतिलानि सिरपाः लःल्हात

येँ – मोतिलानि सिरपाः समितिया ग्वसालय् एसइइनिसें स्नातकोत्तर तगिंतक नेपालभाषा विषयय् उत्कृष्ट ल्याः हयाः उत्तीर्ण जूपिंत छगू ज्याझ्वःया दथुइ मोतिलानि सिरपाः लःल्हात । समितिया नायः प्रा. प्रेमशान्ति तुलाधरया सभापतित्वय् जूगु ज्याझ्वलय् मूपाहां नेपालभाषा केन्द्रीय विभागया प्रमुख प्रा. डा. ओमकारेश्वर श्रेष्ठं उगु सिरपाः लःल्हानादीगु खः ।

थुगुसी नेपालभाषा विषय कयाः उत्कृष्ट ल्याः हयादीपिंमध्ये एसइइ परीक्षाय् सचिन कारंजित (शान्ति निकुञ्ज) व मलिना स्थापित (कन्यामन्दिर), स्नातक तहय् रुपा शाही (पद्मकन्या) व विराट वज्राचार्य (पाटन संयुक्त क्याम्पस), स्नातकोत्तर तहय् राजेन्द्र शाक्य व राकेश महर्जन (नेपालभाषा केन्द्रीय विभाग)यात सिरपाः लःल्हाःगु खः ।

ज्याझ्वलय् मूपाहां श्रेष्ठं दसिपौ व समितिया संरक्षकद्वय सीता ताम्राकार व ज्ञानु सरोज ताम्राकारं दां लःल्हानादीगु खः । ज्याझ्वलय् नवासें मूपाहां श्रेष्ठं मांभासं शिक्षा कायेगु ह्वःताःपाखें विद्यार्थीयात द्यापं लाकेगु स्वये मजिउ धासें वइगु दँया शैक्षिक योजनाय् नेपालभाषा केन्द्रीय विभागय् विद्यावारिधि नं यायेगुकथं न्ह्याः वनाच्वनागु जानकारी बियादिल ।

लिसें वय्कलं एमए उत्तीर्ण यानादीपिं विद्यार्थीपिंत थुगु ह्वःताःयात त्वःमफिकेत नं इनाप यानादिल । बाखं च्वमिलिसें शिक्षाविद् हितकरवीर सिंह कंसाकारं सरकारया शिक्षा नीतिया कारणं नेपालभाषा विषय ब्वँमिपिं व स्यानामिपिनिगु औसत ज्वःमलानाच्वंगु खँ धयादिल ।

मातृभाषा शिक्षायात च्वन्ह्याकेगु ताःतुनाः थनिं नीप्यदँ न्ह्यः मोतिलानि ताम्राकारं थःगु नामं नीस्वनादीगु थुुगु सिरपाः थुगुसी झिंच्याक्वःखुसी लःल्हाःगु खः ।ज्याझ्वः स्वयां न्ह्यः जीवंकाःछि थःत नेपालभाषाया ख्यलय् पानादीम्ह साहित्यकार अष्टमुनि गुभाजुया लुमन्तिइ छगू मिनेट मौन धारण नं याःगु खः ।