स्वनिगलय् बँपसःया विवाद, सीडीओया विज्ञप्तियात येँया वडातपाखें हाथ्या

येँ (नेपालभाषा टाइम्स) – स्वनिगःया स्वंगुलिं जिल्ला प्रशासन कार्यालयं लकडाउन छ्वासुकेगु झ्वलय् जारी याःगु प्रेस विज्ञप्तिइ स्वनिगलय् बँपसः व ठेला गाडा पसः चायेके बीगु धकाः न्ह्यथनातःगु खँयात स्वनिगःया स्थानीय जनतां विरोध याःगु दु ।

बँपसःया कारणं कोरोना संक्रमण अझ न्यना वनेफु धासें येँ महानगरपालिकां जिल्ला प्रशासन कार्यालययात उगु विज्ञप्ति खारेज यानाः न्हूगु जारी यायेत निर्देशन तकं बीधुंकूगु दु। येँ महानगरपालिकाया उपमेयर हरिप्रभा खड्गीया नेतृत्वय् वंगु छगू पुचलं येँया सीडीओ जनकराज दाहालयात उकथं निर्देशन बिउगु खः । उगु इलय् थम्हं निदँ न्ह्यः हे मनपाया नीतिइ बँपसः चीकेगु निर्णय यानातये धुनागु जुयाः सीडीओया थ्व विज्ञप्ति हिलेमाः धकाः थःपिंसं निर्देशन बियागु खँ उपमेयर खड्गीं ‘नेपालभाषा टाइम्स’ यात कनादिल ।

सीडीओपाखें लकडाउन छ्वासुकेगु विज्ञप्तिइ बँपसः नं चायेके दइगु व्यहोरा दुथ्याकेवं येँ मनपा १८ वडा व २४ वडापाखें उकिया विरोध यासें सीडीओनं बँपसः चायेके दइ धाःसां थःपिनिगु वडाय् बँपसः चायेके मबीगु घोषणा याःगु दु। लकडाउन छ्वासुइवं येँया मखं, वंघः आदि लागाय्धाः सा बँपसः तइपिं अप्वया वःगु दु। वंगु शनिवाःनिसें उगु लागाय् हुलमुल जुइक बँपसः तयेगु ज्या जूगु खः ।

मखनय् बँपसः तया हःगु बारे २४ वडाया दुजः विनोद तुलाधरयात स्वापू तयाबलय् वय्कलं सुथय् सुथय् पसः चीकेगु यानाच्वनागु खःसां म्हिगः जागरुक युवा समूहया सछिदँ क्यंगु ज्याझ्वः यायेमाःगु जुयाः बहनी पसः चीकः वने मफयाच्वंगु खँ कनादिल । अथे हे सीडीओया विज्ञप्तिइ बँपसः तये दइगु बुँदा दुथ्याकातःगुलिं कामपाया सुरक्षाकर्मीतय्त बँपसः चीकेत समस्या जुयाच्वंगु खँ नं वय्कलं कनादिल ।

थ्वहे झ्वलय् समाजवादी पार्टीया वरिष्ठ नेता डा. बाबुराम भट्टराईं बँपसः तत्काल चीके मजिउ धकाः ट्वीट यानादीगु दुसा वय्कःया उगु ट्वीटयात नं येँया स्थानीय जनतां आलोचना यानाहःगु दु। वय्कलं थःगु ट्वीटय् बँपसःयात चीकेगु मखु व्यवस्थापन यायेगु खः धासें भाटभटेनीया भीडभाडय्को रोना ल्वय् मपुनीगु तर फुटपाथ व ठेला पसलय् पुनी धइगु जुइ मखु धयादीगु दु ।

थ्वहे झ्वलय् जागरुक युवा समूहं वंगु ९९ न्हु न्ह्यवंनिसें बँपसः चीकेत सफल जूगु खँ धाःगु दु। समूहं बँपसःया कारण संक्रमण अप्वयेफुगुलिं बँपसः निरुत्साहित यायेमाःगु, सम्पदा, देगः, सतः त्वपुयाः बँपसः तयाच्वंगुलिं पसः चीकेमाःगु, पर्यटकीय क्षेत्रय् थीथी कथंया बँपसः तयातःगुलिं पर्यटकपिंसं सम्पदा स्वये मखंगुलिं बँपसः चीकाः सम्पदायात छगू खुल्ला संग्रहालय दयेकेमाःगु खँ धाःगु दु ।

थ्वहे झ्वलय् बँपसः चीकेगु बारे जिल्ला प्रशासन कार्यालयं नं सहलह ब्याकाच्वंगु खँ सीदुगु दु ।

सम्बन्धित बुखँ

LEAVE YOUR COMMENTS