जब जादूगर हे वेपत्ता जुल !

जादूगरं जादू क्यनाः स्वकुमिपिंत मनोरञ्जन बी । मिखाफुति हे याये मलायेकं छुं सामान सुचुकेगु, चखुंयात भ्वं दयेकाबीगु, मनू वेपत्ता यायेगु, मिजंया थासय् मिसाम्ह प्रस्तुत यायेगु, चक्कु लिकयाः भौचा, खाचा, चखुं, बखुं क्यनेगु आदि ज्या याइगु खः । उलि जक मखु मनू, धुँ, खिचा, सल आदियात नं वेपत्ता याना बीफु ।

थज्याःबलय् जादू क्यनीम्ह जादूगर हे वेपत्ता जुल धाःसा छु यायेगु ?भारतय् छम्ह जादूगर थथे हे जादू क्यनेगु झ्वलय् वेपत्ता जूगु दु । भारतीय समाचार एजेन्सीया कथं पश्चिम बंगाल राज्यया छम्ह जादूगर जादू क्यनेगु झ्वलय् वेपत्ता जूगु खः । पश्चिम बंगालया सोनारपुरय् च्वंम्ह चञ्चल लाहिडी नांया जादूगर उकथं जादू क्यनेगु झ्वलय् वेपत्ता जूगु खः ।

जादू क्यनेगु झ्वलय् छगू पंजलय् च्वनाः हुगली खुसिइ कुहां वंम्ह लाहिडी वेपत्ता जूगु खः । तालं ग्वयातःगु पंजलय् च्वनाः थः सकुशल पिहां वयेगु जादू क्यनेगु धकाः लाहिडी हुगली खुसिइ कुहां वंगु खः । तर खुसिइ कुहां वंम्ह लाहिडी धाःसा अनं हे वेपत्ता जुल । लाहिडी थ्व स्वयां न्ह्यः नं थुकथंया जादूया कला सफलतापूर्वक क्यनेधुंकूम्ह खः ।

उकुन्हु वं दकलय् न्हापां हावदाया ताँ क्वय् थःगु जादुइ कला क्यनेगु योजना दयेकूगु खः । तर प्रहरी उगु थासय् जादू क्यनेत अनुमति मबीवं वं उगु थासं छुं भचा तापाःगु थासय् थःगु जादू क्यनेगु योजना दयेकल । लाहिडीयात वया ग्वाहालिमिपिंसं ल्हाःतुति चिनाः पंजलय् दुने तया बिउगु खः ।

वयात पंजलय् तये धुंकाः पिनें तालं नं ग्वया बिउगु खःसा लिपा क्रेनया ग्वाहालिं लाहिडी पंजलय् च्वनाः खुसिइ कुहां वंगु खः । अन मुनाच्वंपिं सकलें हे लाहिडी गबले पिहां वइ धकाः स्वयेत पियाच्वंगु खः । उगु दृश्य स्वयेत अन मुनाच्वंपिं सकलें हे ताःईतक हे पिया नं च्वंगु खः । ताःईतक नं लाहिडी पिहां मवयेवं गुलिसिनं ला व मेगु हे थासं पिहां व धुंकल जुइ धकाः नं पियाच्वंगु खः ।

ताःईतक पियां नं लाहिदी पिहां मवः । व पिहां वइगु ई पिपिउँ आय्बुइवं वयात मालेत गोताखोर व उद्धारकर्मिया पुचः हे खटे यायेमाल । तर अय्नं वयात लुइके धाःसा मफु । वयागु अवस्था छु दु धकाः आतक नं सीके फुगु अवस्था मदुनि ।