समलिंगी इहिपा – मान्यता गबले ?

भारतया सर्वोच्च अदालतपाखें आः नकतिनि छगू फैसला यासें समलिंगी इहिपायात वैघ घोषित यायेवं नेपालय् नं उकिया बारे चर्चा सुरु जूगु दु । भारतय् जूगु थ्व फैसला बारे नेपालय् चर्चा जूगुया कारण नेपालय् नं सर्वोच्च अदालतं थ्व स्वयां यक्व न्ह्यः हे समलिंगी सम्बन्ध बारे फैसला याना तयेधुंकूगुलिं खः ।

नेपाःया सर्वोच्च अदालतं थनिं ११ दँ न्ह्यः हे छगू फैसला यासें समलिंगी इहिपा बारे आवश्यक कानून दयेकि धकाः नेपाः सरकारयात निर्देशन बिउगु खः । तर सर्वोच्चं आदेश बिउसां नं सरकारं उकिया बारे धाःसा छुं हे पलाः न्ह्यःने न्ह्याकूगु मदुनि । सरकारं आवश्यक कानून दयेका मबिउगु कारणं यानाः आपालं समलिंगीतय्गु सम्बन्ध अस्तव्यस्त जूगु खँ समलिंगी सम्बन्धी संस्थाया पदाधिकारीतय्सं धाःगु दु ।
समलिंगी यौन स्वापू कायम यानाः नापं च्वनाच्वंपिं तिपूतय्त कानुनी रुपं छुं मान्यता मबिउगु कारणं यानाः उपिं छम्हं मेम्हेसित उपयोग जक यानाः लिपा त्वःता छ्वयेगु ज्या जुल धकाः आपालं गुनासो वयाच्वंगु खँ नं सम्बन्ध पदाधिकारीतय्सं धाःगु दु । समलिंगी तिपूतय् सम्बन्ध सुरक्षित मजूगु कारणं उमित सुरक्षा बीत नं थुकियात कानुनी मान्यता बीमाःगु माग उमिसं यानाच्वंगु दु ।

तर कानून दयेकेमाःगु निकायया पदाधिकारीतय्सं धाःसा समलिंगी स्वापू बारे नेपाःया आपालं मनूतय्सं आः तक बांलाक खँ हे मथूगु कारणं थुकिया बारे कानून दयेके थाकुयाच्वंगु खँ धाःगु दु । समलिंगी यौन स्वापू तइपिं निम्हं मनूत छगू हे लिंगयापिं जुइगु जूगुलिं उमि दथुइ गय् यानाः इहिपा याकेगु धइगु खँ नेपाःया सन्दर्भय् निर्धारण याये थाकुगु खँ नं धाःगु दु । तर भारतय् धाःसा कानुनी मान्यता हे प्राप्त जूगु दु ।

सम्बन्धित बुखँ

LEAVE YOUR COMMENTS