‘सुर्द्यः’ चिं फ्रिज जुइगु सम्भावना

येँ (नेपालभाषा टाइम्स) – नेकपा विभाजन लिपा आः ‘नेपाल कम्युनिष्ट पार्टी (नेकपा)’ धइगु पार्टीया नां व सुर्द्यः चिं सुयात बीगु धइगु खँय् ब्वलंगु विवाद निरुपण यायेत निर्वाचन आयोगं छगू सामान्य निष्कर्ष पिकाःगु खँ सीदुगु दु ।

सूत्रं धाः कथं ‘नेकपा’ धइगु पार्टीया नां केपी ओली व माधव नेपाल-पुष्पकमल दाहाल निगुलिं पुचःयात बीगु सम्भावना मदु । तत्कालया लागिं थ्व नां नेपाल-दाहाल पुचःयात प्रयोग याके बीगु सम्भावना दु ।  तर निर्वाचन आयोगय् थ्व नांयात कयाः ऋषि कट्टेलं न्हापा हे दावी यानाच्वंगु छगू विवाद कायम दनिगु जुयाः निर्वाचन आयोगं आः उगु विवादया फाइल नं चायेकेत्यंगु खँ सीदुगु दु । वयां लिपा ‘नेकपा’ धइगु नां ऋषि कट्टेलयात बीगु लाकि नेपाल-दाहाल पुचःयात बीगु धइगु न्हूगु मुद्दा खडा जुइ । आयोगं आः थ्व नं कट्टेलयात हे बीगु प्रवल सम्भावना दुगु खँ धाःगु दु ।

ओली पुचलं ‘नेकपा’ नामय् दावी याइगु सम्भावना मदु । निर्वाचन आयोगय् सन्ध्या तिवारीं ‘नेकपा (एमाले)’ नां तयाः न्हापा हे पार्टी दर्ता यानातःगु कारणं ओली पुचलं तिवारीलिसे हे मिले जुयाः थ्व नां काइगु सम्भावना दु । तिवारीयात ओलीपाखें हे एमाले नामं पार्टी दर्ता याकातःगु अनुमान जुयाच्वंगु दु ।

सुर्द्यः चुनाव चिं धाःसा फयांफछि नेपाल-दाहाल पुचःयात मबीगु लागिं निर्वाचन आयोगं कुतः यानाच्वंगु सूत्रया दावी दु । निगुलिं पुचलं सुद्र्यः चिंनय् दावी यानाच्वंगु दनि । यदि सुर्द्यः चिं निम्हेसितं बी मफइगु अवस्था वल धाःसा आयोगं थ्व चिं फ्रिज याये फइगु खँ धाःगु दु ।

सम्बन्धित बुखँ

LEAVE YOUR COMMENTS