चीन थ्यनेवं ओली व्यस्त

लिपुलेकया मुद्दा ल्ह्वनेगु सुझाव वःगु खःसां ओली मौन

येँ – न्यान्हुया चीन भ्रमणय् झाःम्ह प्रधानमन्त्री केपी ओली म्हिगः चीनया राजधानी बेइजिङ थ्यनेवं हे थीथी मनूत नापलायेगु ज्याय् व्यस्त जुयादीगु दु । चिनियाँ प्रधानमन्त्री ली खछ्यानया ब्वनाय् चीन झाःम्ह प्रम ओलीयात विमानस्थलय् विदेश मन्त्रालयया सहायक मन्त्री झुयान हान हुइं लसकुस यानादीगु खः ।

प्रम ओलीं चीनलिसे नेपाःया स्वापू अझ क्वातुकेगु लागिं थ्व भ्रमण यानागु खँ कनादीसां थुकी छुं महत्वपूर्ण सम्झौता जुइगु आशा यानातःगु दु ।भ्रमण छन्हु न्ह्यः वय्कलं पुलांपिं प्रधानमन्त्रीपिंलिसे चीन भ्रमण बारे सल्लाह यानादीगु खः । उगु इलय् पूर्व प्रम डा. बाबुराम भट्टराईं लिपुलेकय् चीनं समेत नेपाःया भूमि अतिक्रमण यानातःगु बारे न्ह्यसः तयेत सुझाव बियादीगु खः ।

तर प्रम ओलीं चीनय् लिपुलेक बारे छुं खँ मल्ह्वनीगु खँ सीदुगु दु ।वय्कलं केरुङंनिसें नेपाः तक हइगु रेल मार्गया लागिं चीनं ग्वाहालि यायेमाः धकाः प्रस्ताव तयादीगु खँ दु । लिसें तातोपानीया नाका लगायत नेपाः दुहां वनेगु मेमेगु नाकात नं चायेकेत इनाप यानादीगु खँ दु । नेपाः–चीन दथुइ न्हय्गू नाका बारे सम्भाव्यता अध्ययन जुयाच्वंगु दु ।

थ्वहे झ्वलय् परराष्ट्रविद् हिरण्य लाल श्रेष्ठं नेपालय् कम्युनिष्ट पार्टीया सरकार दु धायेवं चीनं नुगः चायेकाः ग्वाहालि याइ धकाः आशा मयाःसां जिउ धयादीगु दु । सञ्चारकर्मीतलिसे खँ ल्हासें नेपाःया कम्युनिष्ट पार्टी बहुदलीय व्यवस्थायात माने याइपिं जूगुलिं चीनं पूर्ण रुपं विश्वास मयाइगु बिचाः नं वय्कलं तयादीगु दु ।प्रम ओलीलिसे थीथी मन्त्री, सांसद, येँमनपाया मेयर, व्यापारी समेत यानाः ११० म्हेसिया जम्बो टोली अन वनाच्वंगु दु ।