ने. सं. ११४६ सिल्लाथ्व चौथी -

नेपाःया मिसा मस्त भारतय् मी यंकीगु ५०० प्रतिशतं अप्वल

येँ – नेपालं भारतपाखे मिसा मस्त मी यंकेगु ज्यायात पनेगु लागिं सरकारं थीथी कथंया पलाः न्ह्याकूसां थ्व तस्करी धाःसा दँय्दसं हे अप्वया वनाच्वंगु खँ सीदुगु दु । भारतया सीमा सुरक्षा बलं तयार याःगु छगू प्रतिवेदन कथं नेपाःया मिसा मस्त भारतपाखे मी यंकेगु थ्व ज्या वंगु न्यादँया दुने ५०० प्रतिशतं अप्वःगु दु । नेपाःया मिसा मस्तय्त विशेष यानाः भारतया थीथी तःधंगु शहरय् यौन व्यवसायया लागिं मी यंकीगु खः । नेपाःया मिसा मस्त भारतय् मी यंकेगु ज्या ५०० प्रतिशतं अप्वल धाःसां नेपाः सरकारं धाःसा थुकिया बारे थःपिंके पाय्छि तथ्यांक मदुगु व थ्व दर ५०० प्रतिशत मछि अप्वल धइगु तथ्यांक पत्याः यायेबहः नं मजू धाःगु दु ।