आः झोछेँ लागाय् नं पार्किङ बन्द

येँ (नेपालभाषा टाइम्स)- थनया ऐतिहासिक झोछेँ लागाय् नं म्हिगःनिसें पार्किङ बन्द यात । झोछेँ दुवाःनिखें बसन्तपुर तक म्हिगः येँ महानगरपालिकां माइकिङ यानाः पार्किङ बन्द याःगु खः ।

म्हिगः नगर प्रहरीतय्सं झोछेँनिसें ओमबहाः तक हे पार्किङ बन्द याकेगु धकाः माइकिङ याःगु खःसां आःयात ओमबहाः पाखे धाःसा पार्किङ याये दइगु व्यवस्था याःगु दु ।

बसन्तपुलिंनिसें झोछेँपाखे नं पर्यटक दुकायेगु योजना कथं उगु लागाय् पार्किङ बन्द यानागु खँ सम्पदा अभियन्ता गणपति लाल श्रेष्ठं कनादिल । झोछेँपाखे नं पर्यटक दुहां वयेमा धकाः मनपाया टिकट काउन्टर तकं जुद्ध सतकं चीकाः नौतले दरवारपाखे तये हःगु खः ।

बसन्तपुर लागां नं पर्यटकत झोछेँपाखे दुहां वयेगु शुरु जुल धाःसा अन पर्यटकतय्त अःपुक नये त्वने दइ कथंया वातावरण दयेका वनेगु खँ नं वय्कलं कनादिल । पार्किङ चीकेगु ज्या मनपा २३ वडा ज्याकू, झोछेँ सामुदायिक समाज व स्थानीय व्यवसायीं याःगु खः ।

झोछेँ लागा नेपाःया हे न्हापांगु पर्यटकीयस्थल खः । पर्यटकतय्सं थ्व थाय्यात ‘फ्रिक स्ट्रिट’ नामं नं म्हसिउ । झोछेँया पर्यटकीय स्वरुप हानं म्वाकेत २१ दँ लिपा वडाध्यक्ष मचाराजा महर्जनया पहलं पर्यटकत बसन्तपुलिं झोछेँ वये फइ कथं व्यवस्था याःगु खः ।