चिनिया यानं चन्द्रमाया चा व ल्वहं मुन

एजेन्सी – चन्द्रमाय् च्वंगु चा व ल्वहं मुना हयेगु अभियानय् चीनयात थप सफलता चूलाःगु दु । चीनं चन्द्रमाय् छ्वयातःगु च्याङइ-५ नांया अन्तरिक्ष यान सफलपूर्वक अर्बिटर रिटर्नरय् जोडे जुइत ताःलाःगु खँ चीनया राष्ट्रिय अन्तरिक्ष एजेन्सी (सिएनएसएं) धाःगु दु। सिएनएसएया कथं बेइजिङ्गया ई कथं आइतवाः सुथय् ५ः४२ य् च्याङइ–५ अर्बिटर रिर्टनरलिसे स्वाःगु खः ।

अथेहे स्थानीय ई कथं सुथय् ६ः१२ बजे थ्व यानं चन्द्रमाया सतहय् च्वंगु चा व ल्वहं मुनाः रिटर्नरय् सफलतापूर्वक तःगु खँ सिएनएसएं धाःगु दु। रिटर्नरं हे चन्द्रमाया चा व ल्वहं पृथ्वीइ ज्वना वइ । चन्द्रमाया चा व ल्वहं ज्वना वइगु यान वइगु डिसेम्बरया अन्त्य पाखे मंगोलिया घाँय्या मैदानय् अवतरण जुइगु खँ धाःगु दु। यदि थ्व अभियान सफल जुल धाःसा चीन चन्द्रमाया चा व ल्वहं हयेत ताःलाःगु विश्वया स्वंगूगु देय् जुइ । थ्वयां न्ह्यः अमेरिका व सोभियत संघं जक चन्द्रमाया ल्वहं पृथ्वीइ हयेत ताःलाःगु दु। दकलय् लिपा ४४ दँय सोभियत संघया लुना २४ यानं चन्द्रमापाखें थ्यंमथ्यं २०० ग्राम ल्वहं व चा ज्वनाः पृथ्वीइ कुहां वःगु खः ।