हिमेश व शोभानानीयात पञ्चवीर सिरपाः

येँ (नेपालभाषा टाइम्स) – बुद्ध सम्वत्या हरेक दँय् लः ल्हाना वयाच्वंगु पंचवीर सिंह सिरपाःया लागि मिजं च्वमि पाखे ‘बुद्ध झीथाय् गबले वल !’ शीर्षक च्वसुया लागि हिमेश बज्राचार्य व मिसाच्वमि पाखे ‘बुद्धधर्मया महायान चर्याय् चतुर्निवृत्ति अभ्यासया महत्व’ शीर्षक च्वसुया लागि शोभानानी शाक्य छनौट जूगु दु ।

नेपालभाषा टाइम्स न्हिपतिइ दच्छियंक पिदनिगु च्वसुतमध्ये उत्कृष्ट च्वसुया च्वमितय्त दाता पंचवीर सिंह तुलाधरपाखें थ्व सिरपाः लः ल्हानावयाच्वंगु खः । निर्णायक मण्डलय् डा. गौतमवीर बज्राचार्य व धर्मसुन्दर बज्राचार्य दुथ्याः । यथासमयलय् सिरपाः लःल्हायेगु ग्वःसा दूगु जानकारी नं समूहया नायः मदन बहादुर तुलाधरं बियादीगु दु ।

अथेहे ‘बुद्ध धर्मय् कर्मया भूमिका’ विषयस् जूगु निबन्ध प्रतियोगिताय् प्रमिला ताम्राकार न्हाप घोषित जूगु दु । लुम्बिनी नेप्लीज् बुद्ध धर्म सोसाइटी युके व युवा बौद्ध समूह येँ या मंकाः ग्वसालय् जूगु थुगु प्रतियोगिताय् जमुना गोसाइँ ल्यू व पलिस्था मानन्धर लियांल्यू घोषित जूगु दुसा विद्यालक्ष्मी शाक्य हःपाः सिरपाः त्याकेत ताःलाःगु दु ।

बुद्ध सम्वत् २५६४ प्रारम्भ जूगु लसताय् जूगु थुगु प्रतियोगिताय् मुक्कं २२ पू च्वसु दुथ्याःगु खः । डा. रीना तुलाधर, डा. सुरेन्द्रमान बज्राचार्य व डा. त्रिरत्न मानन्धर दुथ्यागु निर्णायक मण्डलं विजेता ल्ययेगु ज्या जूगु खः ।