नेकपाय् ‘छम्ह मनू छगू पद’ जुइमाःगु माग
येँ – सत्तारुढ दल नेपाल कम्युनिष्ट पार्टी दुने ब्वलंगु विवाद झन तच्वया वनाच्वंगु दु । म्हिगः नं सचिवालयया बैठकय् जिल्लाया इञ्चार्ज व सहइञ्चार्ज बारे खँ मिले मजुइवं बैठक स्थगित जुल । सूत्रया कथं पार्टी दुने मेम्ह अध्यक्ष पुष्पकमल दाहाल, वरिष्ठ नेतात माधव नेपाल व झलनाथ खनाल ‘छम्ह व्यक्ति छगू पद’ जुइमाः धइगु पक्षय् दुसा मेखे प्रधानमन्त्री केपी ओली धाःसा क्षमता दुम्ह व्यक्तियात निगुलिं पद बिउसां जिउ धइगु पक्षय् दु ।
थः पार्टी अध्यक्ष लगायत प्रधानमन्त्री समेत जूगुलिं ओलीं अज्याःगु अडान कयाच्वंगु खःसा मेखे दाहाल गुटं धाःसा ‘छम्ह व्यक्ति छगू पद’ जुल धाःसा छगू पद थःत वइगु जुयाः थ्व पक्षय् थःगु बिचाः तयेगु यानाच्वंगु दु ।ओलीं जिल्लाया इञ्चार्ज व सहइञ्चार्ज पद मन्त्री व सांसदतय्त बीमाः धकाः अडान कयाच्वंगु दुसा मेगु पुचलं धाःसा सांसदतय्त जिल्लाया इञ्चार्ज व सहइञ्चार्ज दयेके मजिउ धकाः अडान कयाच्वंगुलिं सचिवालयया बैठक आः निवाः लिपा जक च्वने फइगु जूगु दु ।
प्रम ओली थ्वहे वइगु आइतवाः युरोप भ्रमणय् वनेत्यंगुलिं आः पार्टी एकीकरणया ल्यं दुगु ज्या नं निवाः लिपा जक न्ह्याइगु खँ धाःगु दु । यदि जिल्लाया इञ्चार्ज व सहइञ्चार्ज मन्त्री व सांसदतय्त दयेके मफुत धाःसा प्रम ओली अल्पमतय् लाइगु जूगुलिं हे वय्कलं थ्व अडान कयाच्वंगु द्वपं मेगु पक्षं बियाच्वंगु दु ।
पार्टी दुने विशेषतः माधव नेपालं पार्टी एकीकरणया इलय् छम्ह व्यक्ति छगू पदया अवधारणायात लागू यायेमाः धायेगु यानाच्वंगु खःसा उकियात दुनें दुनें मेम्ह अध्यक्ष दाहालं नं ग्वाहालि यानाच्वंगु खँ सूत्रं धाःगु दु ।
छगू पद छम्ह व्यक्ति जुल धाःसा दाहाल अध्यक्ष जुइगु सम्भावना दुगुलिं दाहालं थुकथं भूमिका म्हिताच्वंगु सूत्रया दावी दु । तर प्रम ओली छम्ह व्यक्ति छगू पद जुइवं पार्टी दुने थःगु भूमिका म्हो जुइगु आशंकां पार्टीया अध्यक्ष त्वःतेत हिचकिचे जुयाच्वंगु खँ सूत्रं धाःगु दु ।
LEAVE YOUR COMMENTS