बौद्ध दर्शनसम्बन्धी विश्व सम्मेलन नेपालय् यायेगु प्रस्ताव

येँ – चारुमति बुद्ध विहारया प्रमुख भिक्षु तपस्सी धम्म म्यान्मा (वर्मा) बिज्याःगु दु । म्यान्माया बगान धइगु थासय् माघ ६ गतनिसें १२ गते तक जुइगु वल्र्ड एलाएन्स बुद्धिष्टया बैठकय् ब्वति कायेत वसपोल उखेपाखे बिज्याःगु खः । नेपाः, संयुक्त अरब इमिरेट्स, बंगलादेश, कम्बोडिया, थाइल्याण्ड, लाओस लगायत नीखुगू देशं ब्वति काइगु खँ सी दुगु दु ।

संगठनया केन्द्रीय उपाध्यक्षतकं जुयाच्वना बिज्याःम्ह वसपोलं बैठकय् नेपाःया आर्थिक व सामाजिक रुपान्तरणय् बौद्ध शिक्षाया योगदानया बिषयय् जानकारी बियाबिज्याःगु ज्याझ्वः दु । लिसें उगु बैठकय् सन् २०१९ य् बौद्ध दर्शनसम्बन्धी विश्व सम्मेलन नेपालय् यायेगु निंतिं औपचारिक प्रस्ताव तइगु जूगु दु ।