भक्तपुर साहित्य समाजया न्हापांगु नेपालभाषा साहित्य गोष्ठि
ख्वप- भक्तपुर साहित्य समाजया ग्वसालय् वंगु शनिवाः न्हय्क्वःगु (७० क्वःगु) घुमन्ते साहित्यिक श्रृंखला अन्तर्गत न्हापांखुसी नेपालभाषा साहित्य गोष्ठि जुल ।
समाजया ग्वसालय् भक्तपुर पार्टी भेन्यु गःपलिइ जूगु नेपालभाषा साहित्य गोष्ठिइ साहित्यकारपिं गोविन्दमान श्रेष्ठ, महेन्द्रगोपाल कर्माचार्य, सौरभ शाकय, बद्री वेदना, सुधीर ख्वबि, धनमान श्रेष्ठ, विमल ताम्राकार, प्रतिसरा साय्मि, बाबुकाजी सुवाल, माणिकबाबु ग्वंगः, रामगोपाल आशुतोष, डा. पुष्पराज राजकर्णिकार लगायतं च्वसु ब्वनाः न्यंकादीगु खः ।
ज्याझ्वलय् मूपाहां भक्तपुर विकास संघया पुलांम्ह नायः अध्यक्ष कृष्णलाल प्रधानं समाजया अध्यक्ष राजुराम मुनंकःमि च्वयादीगु चिबाखं मुना सपूm ‘घाः’या पितब्वज्या यानादीगु खः । ज्याझ्वलय् नवासें मूपाहां प्रधानं साहित्य धइगु भाषा व पहिचान ल्यंकेगु अभिन्न अंगः जूगुलिं थुकथंया साहित्यिक गतिविधि याना न्ह्यःने वने फत धाःसा राजनीतिक, आर्थिक व सामाजिक रुपान्तरणया निंतिं तःधंगु तिबः जुइ धयादिल ।
समाजया संस्थापक अध्यक्ष काशिराम विरसया सभापतित्वय् भक्तपुर विकास संघया अध्यक्ष राजाराम मधिकःमि विशेष पाहांकथं झायादीगु ज्याझ्वलय् नांजाःम्ह आख्यानकार मथुरा साय्मि, साहित्यकार डा. राजकर्णिकार व ज्याझ्वःया संयोजक पुरुषोत्तम प्रजापतिपिंसं नुगःखँ तयादीगु खः ।
LEAVE YOUR COMMENTS